स्वस्तात घर, पतीला नोकरीचे आमिष
म. टा. वृत्तसेवा, ठाणे
फसवणूकप्रकरणी अटकेत असलेल्या दीप्ती मुळीक या तरुणीने महिला पोलिसाशी ओळख वाढवून एनजीओच्या कोट्यातून एक कोटीचे घर अर्ध्या किंमतीत देण्याचे आमिष दाखवून तिला गंडा घातल्याचा प्रकार समोर आला आहे. विशेष म्हणजे, या तरुणीने या महिला पोलिसाच्या पतीला बहुराष्ट्रीय कंपनीत नोकरी लावण्याच्या नावाखालीही पैसे उकळले असून याप्रकरणी ठाणेनगर पोलिस ठाण्यात फसवणुकीचा गुन्हा दाखल करण्यात आला आहे.
ठाणे पोलिस दलात कार्यरत असलेल्या या ३२ वर्षीय महिला पोलिस नाईकाची कैदीपार्टीच्या ड्युटीदरम्यान ठाणे न्यायालयात दीप्ती मुळीक हिच्याशी ओळख झाली होती. इलेक्ट्रिक वस्तूंची आयात-निर्यात तसेच मालमत्ता खरेदी-विक्रीचा व्यवसाय करत असल्याचे दीप्तीने सांगितले होते. नंतर दोघीही मोबाइलच्या माध्यमातून एकमेकांच्या संपर्कात होत्या. त्याच दरम्यान दीप्तीने महिला पोलिसाची ठाणे मध्यवर्ती कारागृहाबाहेर भेट घेत ठाण्यातील एका बांधकाम प्रकल्पातील एक कोटीचे घर अर्ध्या किंमतीत मिळवून देण्याचे आमिष दाखवले. त्यावर विश्वास ठेवून महिला पोलिसाने उसने पैसे घेऊन अडीच लाख रुपये दीप्तीला दिले होते. पतीच्या नावे आणखी एक घर घेण्यासाठी आणखी अडीच लाखांची रक्कमही तिने दिली होती. नंतर या महिला पोलिसाच्या पतीला बहुराष्ट्रीय कंपनीत चांगल्या पगाराची नोकरी देण्याचे आमिष दाखवून दीप्ती हिने आणखी एक लाख रुपये उकळले होते. अशाप्रकारे आरोपी तरुणीने वेळोवेळी एकूण १३ लाख ८१ हजार रुपये घेतले. मात्र घर आणि नोकरी मिळाली नाही. महिला पोलिसाच्या तक्रारीनंतर दीपाली उर्फ दिप्ती मुळीक हिच्या विरोधात फसवणुकीचा गुन्हा दाखल करण्यात आला. दरम्यान दीप्तीला अन्य एका फसवणुकीच्या गुन्ह्यात गुन्हे शाखा युनिट एकने अटक केली आहे.