बदलापुरात कामगार बचावले

म. टा. वृत्तसेवा, बदलापूर

बदलापूर एमआयडीसीतील गुरुदेव टेक्स्टाइल कंपनीला भीषण आग लागल्याची घटना रविवारी घडली. आगीच्या घटनेवेळी कंपनीत सहा कामगार झोपले होते, मात्र वेळीच कामगारांनी बाहेर पळ काढल्याने सर्वजण थोडक्यात बचावले. आगीत कंपनीच्या मालाचे नुकसान झाले. शॉर्टसर्किटमुळे ही आग लागल्याचा प्राथमिक अंदाज आहे.

बदलापूर एमआयडीसीत गुरुदेव टेक्स्टाइल कंपनी आहे. रविवारी पहाटे साडेचारच्या सुमारास कंपनीत कपड्यांच्या साठ्याला भीषण आग लागली. आग लागली त्यावेळी सहा कामगार कंपनीत झोपले होते. तसेच, आग वाढल्याने कपड्यांच्या साठ्याने मोठ्या प्रमाणात पेट घेतल्याने परिसरात धुराचे प्रचंड लोट पसरले. या आगीची माहिती मिळताच कामगारांनी वेळीच बाहेर पळ काढला. बदलापूर नगरपरिषदेच्या अग्निशमन दलातील फायर ऑफिसर भागवत सोनवणे, फायरमन प्रदीप जाधव, शैलेश जगताप, जावळे, बोराडे, स्टिफेन, गायकर, गुरव आदींनी घटनास्थळी धाव घेतली. मात्र आग मोठ्या प्रमाणात असल्याने अंबरनाथ नगर परिषद व आनंद नगर एमआयडीसीतील अग्निशमन दलालाही मदतीसाठी बोलावले. अखेर ११ तासांच्या अथक प्रयत्नानंतर दुपारी तीन वाजता ही आग विझवण्यात यश आले.