​हयातीच्या दाखल्यासाठी ज्येष्ठ नागरिक रांगेत

बायोमेट्रिकअभावी जुनीच प्रक्रिया

आदित्य बिवलकर

ठाणे : नोव्हेंबर उजाडल्यावर ज्येष्ठ नागरिकांची हयातीचा दाखला प्राप्त करण्यासाठी धावाधाव सुरू होते. यापुढे ज्येष्ठ नागरिकांचा वेळ वाचेल असे बँकाकडून गेल्यावर्षी अर्ज करताना सांगण्यात आले होते. मात्र यंदाही हयातीच्या दाखल्यासाठी बँकांमध्ये त्यांना रांगेत उभे रहावे लागत आहे. यंदा ही सेवा ऑनलाइन उपलब्ध होणार होती. मात्र त्याबद्दल ज्येष्ठ नागरिकांना पूर्ण माहितीच नसल्यामुळे बँकांमध्ये ज्येष्ठ नागरिकांची गर्दी होत त्यांना बँकेत दोन-तीन फेऱ्या माराव्या लागत आहेत.

यंदा हा अर्ज करण्यासाठी ३० नोव्हेंबरपर्यंत मुदत आहे. बँकेबरोबरच ऑनलाइन अर्ज करून कागदपत्रं सादर करण्याची सुविधा यंदा अंमलात येणार होती. यासाठी बायोमेट्रिक सेंटर्सची मदत घेऊन स्कॅनिंग करण्यात येणार होते. त्यामुळे ज्येष्ठ नागरिकांनी सुरुवातीला बँकेत गर्दी केली नव्हती. मात्र आता जुन्याच पद्धतीने फॉर्म भरून अनेक ठिकाणी प्रक्रिया पार पाडावी लागत असल्याने बँकेमध्ये पुन्हा ज्येष्ठ नागरिकांची गर्दी होत आहे.

ज्येष्ठांना या बदलाविषयी पूर्ण माहिती उपलब्ध नसल्याने तसेच संगणक आणि तंत्रज्ञानाशी जुळवून घेण्यात अडचण असल्याने नवीन तंत्रज्ञानाचा उपयोग होत नाही. अनेक ठिकाणी ऑनलाइन सेवा सुरूही झालेली नसल्याने बँकेमध्ये जाऊन अर्ज करून कागदपत्रे सादर करावी लागत आहेत. त्यामुळे या वेळकाढू प्रक्रियेऐवजी सोपी प्रक्रिया व्हावी व त्याची माहिती मिळावी अशी अपेक्षा ज्येष्ठ नागरिक व्यक्त करीत आहेत. घरबसल्या अर्ज करून त्यानंतर पडताळणीची सुविधा उपलब्ध व्हावी, अशी अपेक्षा संगीता जोशी यांनी व्यक्त केली.

बँकांवर ताण

बँकिंग व्यवहाराचा व्याप वाढत असताना दाखल्यांच्या कामाचा ताण बँकांवर पडत आहे. प्रत्येक विभागाने ही सेवा पुरवली पाहिजे. त्याचबरोबर ऑनलाइन सेवांचा वापर योग्य पद्धतीने करून या सेवा दिल्या गेल्या पाहिजेत, अशी बँक कर्मचाऱ्यांची अपेक्षा आहे. एका बँकेत रोज साधारण १०० दाखले उपलब्ध करून दिले जातात.

आधार लिंकिंगमध्ये अडचणी

दाखले प्राप्त करण्यासाठी आधार कार्डाचे लिंकिंग करणे आवश्यक असते. मात्र ज्या ज्येष्ठ नागरिकांनी २०११च्या आधी आधारकार्ड प्राप्त केले आहे त्यांना आधार कार्डच्या लिंकिंगमध्ये अडचणी येत असल्याचा अनुभव येत आहे.

बदल नाहीच

पुढच्या वर्षी प्रक्रिया सोपी असेल असे आम्हाला सांगण्यात आले होते. मात्र यंदा प्रक्रियेत फरक पडलेला दिसत नाही. त्यामुळे त्याबद्दल व्यवस्थित माहिती मिळायला पाहिजे.

संध्या कुलकर्णी, ज्येष्ठ नागरिक

माहिती हवी

ज्येष्ठ नागरिकांसाठी पेन्शन, हयातीचा दाखला महत्त्वाचा असतो. त्यावर अनेक गोष्टी अवलंबून असतात. मात्र अनेक ज्येष्ठ नागरिकांना याबद्दल माहिती नसते. त्यामुळे याबद्दल माहिती देण्याची गरज आहे.

महेश जाधव, ज्येष्ठ नागरिक