कोंडेश्वर कुंडात बुडून तरुणीचा मृत्यू

म. टा. वृत्तसेवा, बदलापूर

पावसाळी पर्यटनाच्या निमित्ताने बदलापूरजवळील कोंडेश्वर कुंडात पिकनिकसाठी गेलेल्या कळव्यातील एका तरुणीचा बुडून मृत्यू झाल्याची घटना बुधवारी घडली. त्यामुळे वारंवार सुरक्षेच्या सूचना देऊनही बेभान होणाऱ्या तरुणाईला रोखायचे कसे, हा प्रश्न निर्माण झाला आहे.बदलापूरजवळील कोंडेश्वरच्या कुंडात पिकनिकसाठी कळवा येथून नऊ तरुणींचा ग्रुप गेला होता. यावेळी आपल्या मैत्रिणींसह कोंडेश्वरच्या कुंडात पाण्याचा आनंद घेण्यासाठी रोशनी पाण्यात उतरली होती. मात्र पोहताना पाण्याचा अंदाज न आल्याने कळवा येथील रोशनी दिघे (२०) हिचा बुडून मृत्यू झाला. रोशनी पुण्यात डिप्लोमचे शिक्षण पूर्ण करुन पालकांकडे आली होती. तरुणीचा मृतदेह उल्हासनगरच्या मध्यवर्ती रुग्णालयात शवविच्छेदनासाठी पाठवण्यात आला असून बदलापूर ग्रामीण पोलिस ठाण्यात नैसर्गिक मृत्यूची नोंद करण्यात आली आहे.

बदलापूरजवळील कोंडेश्वरच्या कुंडात पावसाळी पिकनिकदरम्यान पर्यटकांच्या बुडून मृत्यु झाल्याच्या घटना वाढत आहेत. याबाबत पोलिस प्रशासन वारंवार पर्यटकांना सुरक्षिततेच्या सूचना देत असतात. मात्र पर्यटक याकडे कानाडोळा करत असतात. त्यामुळे आतापर्यंत अनेक तरुणांना आपले जीव गमवावे लागले आहेत. मुख्य कुंडाजवळ धोकादायक क्षेत्राची माहिती देणारे फलकही लावण्यात आले आहे. मात्र तरी याकडे तरुणींनी

दुर्लक्ष केले होते.