म. टा. वृत्तसेवा, वसई
शिवी दिली तसेच अपशब्द वापरले या किरकोळ कारणावरून मित्रांनीच मित्राची हत्या केल्याची घटना नालासोपारा शहरात सोमवारी सकाळी घडली. तुळींज पोलिस स्टेशनात याप्रकरणी गुन्हा दाखल झाला असून हत्या करणाऱ्या दोन तरुणांना पोलिसांनी अटक केली आहे. या दोन्ही आरोपींना मंगळवारी वसई कोर्टात हजर केले जाणार आहे.
प्रतीक संजय कदम (२०) असे हत्या झालेल्या तरुणाचे नाव असून तो नालासोपारा पूर्वेकडील शिर्डी नगर भागात राहत होता. तो स्टेज डान्सर होता. तर त्याचे मित्रही त्याच इमारतीत राहणारे असून शिर्डी नगर भागात ही घटना सोमवारी सकाळी ६ वाजता भर रस्त्यावर घडली. त्याच्या दोन मित्रांनी तोंडावर दगड टाकून या तरुणाची हत्या केली, अशी माहिती पोलिसांनी दिली. शुभम संजय भिसे (२०), सम्राट विश्वनाथ पावसकर (२७) अशी दोघा आरोपींची नावे असल्याची माहिती तुळींजचे पोलिस इन्स्पेक्टर प्रकाश बिराजदार यांनी दिली. मयत व आरोपी हे तिघे रविवारी रात्री ११ वाजल्यापासून सकाळी ६ वाजेपर्यंत येथे दारू पित बसले होते. किरकोळ कारणावरून तिघांमध्ये वाद झाला. त्याचे पर्यवसान हाणामारीत झाले. त्या रागातून दोघांनी ही हत्या केली.