शाळेतील 14 विद्यार्थ्यांना कोरोनाची लागण, सर्वच्या सर्व 89 विद्यार्थ्यांना घरी पाठवलं

वर्धा : वर्ध्याच्या सेलू काटे येथील जवाहर नवोदय विद्यालयाच्या 14 विद्यार्थ्यांना कोरोनाची लागण झाल्याने खळबळ उडालीय. 14 विद्यार्थी कोरोनाबाधित झाल्याने शाळेत शिकत असलेल्या दहावी आणि बारावीच्या 89 विद्यार्थ्यांना काही दिवसांकरिता घरी पाठविण्याचा निर्णय घेण्यात आला आहे.

शनिवारी शाळेतल्या सहा विद्यार्थ्यांचा कोरोना चाचणी अहवाल पॉजिटिव्ह आला होता. त्यामुळे आज आरोग्य विभागाने शाळेत 25 विद्यार्थ्यांची चाचणी केली. त्यापैकी 8 विद्यार्थ्यांचा अहवाल पॉजिटिव्ह आला आहे.

शाळेतील दोन विद्यार्थी सुट्टी घेऊन घरी गेले असता त्यांना कोरोना रिपोर्ट पॉजिटिव्ह आला. यामुळे शनिवारी ही माहिती मिळताच शाळा प्रशासनाने काही विद्यार्थ्याची चाचणी केली त्यात चौघे पॉजिटिव्ह आले. असे शनिवारी एकूण सहा तर आज आठ विद्यार्थी पॉजिटीव्ह आले आहे.

दरम्यान, सध्या शाळेत दहावी आणि बारावीचे विद्यार्थीच शिक्षणासाठी होते. सर्व पॉजिटिव्ह विद्यार्थ्यांना त्यांच्या पालकांनी घरी घेऊन जाण्याचा निर्णय घेतला असल्याने शाळेने त्यांना रजेची मंजुरी दिलीय.