वर्ध्यात अल्पवयीन मुलीचा गर्भपात, ५ आरोपींना बेड्या, चाकणकरांचं तातडीने पोलिस अधिक्षकांना पत्र

वर्धा : जिल्ह्यातील आर्वी येथील कदम हॉस्पिटलमध्ये अल्पवयीन मुलीच्या गर्भपाताची घटना उघडकीस आल्यानंतर ५ आरोपींवर गुन्हा दाखल करून त्यांना अटक करण्यात आली आहे. या संवेदनशील प्रकरणाची राज्य महिला आयोगाच्या अध्यक्षा रुपाली चाकणकर यांनी गंभीर दखल घेतली असून यासंदर्भात वर्धा जिल्हा पोलिस अधिक्षकांना पत्र लिहिलं आहे. या घटनेचा खोलवर तपास करून यामध्ये आणखी काही धागेदोरे हाती लागतात का याचा तपास करण्याचे निर्देश पोलीस प्रशासनाला चाकणकरांनी दिले आहेत.

१३ वर्षीय अल्पवयीन मुलीचा गर्भपात केल्याप्रकरणी संबंधित आरोपींना पोलिसांनी अटक केली आहे तसंच वर्ध्यातील प्रसिद्ध डॉक्टरांनाही पोलिसांनी बेड्या ठोकल्या आहेत. वर्ध्याच्या घटनेने राज्यात तसंच वैद्यकीय क्षेत्रात खळबळ उडाली आहे.

आर्वी येथील कदम हॉस्पिटलमधील डॉक्टर ज्यांना अल्पवयीन मुलीचा गर्भपात केला आहे, त्यांना पोलिसांनी बेड्या ठोकल्या आहेत. तर या प्रकरणातील अल्पवयीन आरोपीला देखील पोलिसांनी ताब्यात घेतलं आहे.

चाकणकरांनी जिल्हा पोलिस प्रमुखांना लिहिलेल्या पत्रात काय म्हटलंय?

वर्धा जिल्ह्यातील आर्वी येथील कदम हॉस्पिटलमध्ये अल्पवयीन मुलीच्या गर्भपाताची घटना उघडकीस आल्यानंतर ५ आरोपींवर गुन्हा दाखल करून त्यांना अटक करण्यात आली आहे. पोलिसांनी अधिक तपास केला असता हॉस्पिटलच्या आवारात असलेल्या बायोगॅस प्लॅन्टच्या जागेत ५ मृत अर्भकांच्या कवट्या आणि हाडांचे अवशेष सापडले आहेत. ही बाब अतिशय धक्कादायक आणि डॉक्टरी पेशाला व माणुसकीला काळीमा फासणारी आहे.

या घटनेचा खोलवर तपास करून यामध्ये आणखी काही धागेदोरे हाती लागतात का याचा तपास करण्याचे निर्देश पोलीस प्रशासनाला दिले आहेत. तसेच भविष्यात अशा घटना घडूच नये यासाठी भरारी पथकाच्या माध्यमातून कार्यवाही करण्याचे आदेश राज्य महिला आयोगाच्या वतीने देण्यात आलेले आहेत, असं चाकणकरांनी म्हटलं आहे.

वर्ध्याची नेमकी घटना काय?

मिळालेल्या माहितीनुसार, आर्वी शहरातील अल्पवयीन मुलाचे अल्पवयीन मुलीसोबत प्रेमसंबंध जुळले, मुलगा साडे सतरा वर्षांचा आहे तर मुलगी १३ वर्षांची आहे. यादरम्यान, मुलीला गर्भधारणा झाली, या प्रकरणाची कुठेही वाच्यता होऊ नये म्हणून संबंधितांनी गर्भपात करण्याचा निर्णय घेतला. शहरातील प्रसिद्ध डॉ. रेखा कदम यांनी मुलीचा गर्भपात केला. ८० हजरा रुपये घेऊन हा गर्भपात करण्यात आला. याबाबत पोलिसांकडे तक्रार प्राप्त झाल्यानंतर पोलिसांनी भल्या सकाळी डॉक्टरांना ताब्यात घेतलं तसंच या केसमधील आरोपींनाही पोलिसांनी बेड्या ठोकल्या.