ऊस तोडणीसाठी घेतलेले पैसे दिले नाहीत; मुकादमाने मजुराच्या पत्नीसह ११ महिन्यांचा मुलीला उचललं

वाशिम : जिल्ह्यातील मानोरा तालुक्यातील अनेक मजूर हंगामात ऊस तोडणीसाठी पश्चिम महाराष्ट्र जात असतात. बऱ्याचदा मुकादमाकडून ते अग्रीम रक्कम घेतात. मात्र काही कारणामुळे ते पैसे परत करता आले नाही तर मुकादमाकडून मोठा अत्याचार त्यांच्यावर केला जातो. असाच प्रकार मानोरा तालुक्यातील रोहना येथील मजूर राजू मोतीराम पवार यांच्या बाबतीत घडला आहे.

उसने घेतलेले पैसे मुदतीत परत न केल्याने गोडगाव वैराग जि. सोलापूर येथील ऊसतोड मुकादमाने राजू यांच्या पत्नीसह ११ महिन्यांच्या चिमुकलीला उचलून नेल्याचा धक्कादायक प्रकार वाशिम जिल्ह्यातील रोहना येथे घडला. याबाबतची तक्रार मजुराने १९ फेब्रुवारी रोजी मानोरा पोलीस स्टेशनमध्ये दिली असून पोलीस या प्रकरणाचा तपास करत आहेत.

मोठी बातमी : एकनाथ शिंदेंचा बदनामीकारक उल्लेख; संजय राऊतांवर नाशिकमध्ये गुन्हा दाखल

तब्येत बरी नसल्याने आणि ग्रामपंचायत निवडणुकीमुळे पुन्हा ऊस तोडण्याच्या कामासाठी जाऊ शकलो नाही, पुढील हंगामात कामाला येऊन पैसे फेडण्याचे कबूल करूनही मुकादम रतन राठोड याने १९ फेब्रुवारी रोजी स्कार्पिओ गाडी आणून बळजबरीने राजू यांची पत्नी व ११ महिन्यांच्या चिमुकलीस गाडीत टाकून नेले. पैसे तत्काळ परत न केल्यास जीवे मारण्याची धमकीही दिली. पत्नी व मुलीशिवाय इतरही नऊ व्यक्तींना मुकादम राठोडने सोबत नेल्याची फिर्याद राजू पवार याने मानोरा पोलीस स्टेशनला दाखल केली. पोलिसांनी घटनेची नोंद करून प्रकरणाचा तपास सुरू केला

दरम्यान, मानोरा पोलीस स्टेशनअंर्तगत येत असलेल्या रोहना येथील राजू मोतीराम पवार यांच्या तक्रारीनुसार, ते आणि त्यांचा भाऊ हे कुटुंबीयांसह गतवर्षी गोडगाव वैराग येथे ऊस तोडण्यासाठी गेले होते. काम आटोपल्यानंतर मुकादम रतन राठोड यांच्या संमतीने घरी आले होते. तेव्हा उसने घेतलेले एक लाख रुपये परत करण्याचे राहून गेले. ते पुढील वर्षी काम करून फेडण्याचे ठरले होते; मात्र, मुलाची तब्बेत बरी नसल्याने व ग्रामपंचायत निवडणुकीमुळे ऊस तोडणीसाठी जात आले नाही. येणाऱ्या हंगामात ऊस तोडणीसाठी येऊन पैसे फेडू असे मुकादमाला संगितले. मात्र त्याने काहीही न ऐकता पत्नी व मुलीला उचलून नेले अशी तक्रार राजू पवार यांनी दिली आहे.