VIDEO : संत गजानन महाराज मंदिरात दर्शनासाठी आला अन्..., चोरट्याचं कृत्य सीसीटीव्हीत कैद

वाशिम : सध्या सर्वत्र दिवाळी सणाची धामधूम सुरू आहे. दिवाळीत अनेक जण मंदिरात देवाकडे सुख-समृद्धी मागण्यासाठी जात असतात. मात्र वाशिम जिल्ह्यातील वनोजा येथील संत गजानन महाराज मंदिरात एका चोरट्याने रात्री १ वाजताच्या सुमारास घुसून तेथील दानपेटीतील रक्कम चोरून नेली आहे. दानपेटीत अंदाजे ५० हजार रुपयांहून अधिक रक्कम असल्याचे ग्रामस्थांनी सांगितले.

दानपेटीतील रक्कम चोरीची घटना सीसीटीव्हीत कैद झाली आहे. दानपेटीतील पैसे पळवणाऱ्या चोरट्याने दिवसा मंदिरात दर्शनाच्या निमित्ताने येऊन मंदिर परिसराची पाहणी केली आणि त्यानंतर रात्री मंदिरात कुणीही नसल्याची संधी साधत दानपेटी फोडून ही रक्कम चोरून नेली असल्याची माहिती ग्रामस्थांनी दिली आहे.



दरम्यान, या घटनेची नोंद पोलीस ठाण्यात करण्यात आली असून याप्रकरणी पोलीस अधिक तपास करत आहेत.