कलेक्टर साहेबांच्या घरात गमट्रॅपमध्ये उंदराऐवजी अडकला साप, अन् पुढे मग....

रवी राऊत/यवतमाळ : एरव्ही साधा साप म्हटलं तर सर्वसामान्य नागरिकांना घाम येतो. त्यातही विषारी नाग असला तर काही बोलायची सोय नसत आणि हाच विषारी नाग तुमच्या घरात उंदरासाठी लावलेल्या एखादा सापळ्यात अडकला तर काय होईल...? नेमका असाच प्रकार यवतमाळचे जिल्हाधिकारी अमोल येडगे यांच्या शासकीय निवासस्थानात उघडकीस आला. उंदीर पकडण्यासाठी लावण्यात आलेल्या गम ट्रॅपमध्ये चक्क विषारी नाग चिकटलेला आढळून आला.

जिल्हाधिकारी अमोल येडगे यांचे शासकीय निवासस्थान जिल्हाधिकारी कार्यालयाच्या समोरच्या बाजूला आहे. त्यांच्या निवासस्थानात उंदीर पकडण्यासाठी गमट्रॅप लावून ठेवण्यात आला होता. शुक्रवारी सकाळी त्या ट्रॅपमध्ये उंदीर अडकला आहे का हे पाहण्यात आले असता या ठिकाणी उंदराऐवजी चक्क विषारी नाग गमट्रॅपमध्ये चिटकून असलेला आढळून आला.

दरम्यान, जिल्हाधिकारी यांनी mh29 हेल्पिंग हँड्सला याची माहिती दिली. जिल्हाधिकाऱ्यांचा फोननंतर वन्यजीव रक्षक निलेश मेश्राम, सर्पमित्र जीवन तडसे, सुरज खडके,ओम ठाकरे जिल्हाधिकाऱ्यांच्या निवासस्थानी दाखल झाले.

त्यांनी पाहणी केली असता तिथे विषारी जातीचा नाग ट्रॅपमध्ये चिकटलेला आढळून आला. नागाला बाहेर काढून यवतमाळ येथील पशुवैद्यकीय दवाखान्यात डॉ. राजेंद्र अलोणे आणि डॉ.बी .व्ही चव्हाण, डॉ.तृप्ती वर्मा यांच्या मार्गदर्शनात नागावर उपचार केले. त्यानंतर वन विभागात त्याची माहिती देऊन रितसर नोंद करून नागाला आदिवासात सोडून देण्यात आले.