ना अॅसिडिटी, ना कसला त्रास, रामाजींच्या आयुर्वेदिक चहाचे यवतमाळकर दिवाने!

रवी राऊत, यवतमाळ : यवतमाळ येथील जिल्हाधिकारी कार्यालयाच्या मागे जिल्हा न्यायालय परिसरात रामाजी वेट्टी यांची चहाची टपरी आहे. येथे गूळ, अद्रक आणि हळद आयुर्वेदिक मसाला घालून काळा चहा मिळत असल्याने यवतमाळकर नागरिक रामाच्या चहाचे दिवाने झाले आहे. आयुर्वेदिक काळा चहा पिल्याने अॅसिडिटीचा त्रास होत नाही. त्यामुळे रामाजीचा चहा ऍसिडिटीवर रामबाण उपाय ठरत आहे.

रामाजी वेट्टी यांची जिल्हा न्यायालय परिसरात चहाचं कँटीन आहे. कायम वर्दळीचे ठिकाण असल्याने येथे गर्दी बघायला मिळते. त्या गर्दीतील अनेक चहाचे दर्दी ग्राहक हे रामाजीच्या कँटीनवर दिसतात.

गुळाचा चहा पिणाऱ्यात वकील, कर्मचारी, अधिकारी यांच्यासह सामान्य नागरिकांचा समावेश आहे. १९८० पासून रामाजी यांनी चहाची कँटीन सुरू केली. गेल्या चाळीस वर्षापासून हा व्यवसाय सुरू आहे. तीन मुली व एका मुलाचा विवाह केला असून, याच व्यवसायाच्या माध्यमातून ते संसाराचा गाडा ओढत आहे.

दुधाचा चहामुळे अॅसिडिटी होते. त्यामुळे अनेक लोक चहा म्हटले की, नकार देतात. परंतु, रामाजीचा आयुर्वेदिक ब्लॅक चहाची ऑर्डर मोठ्या आवडीने दिली जाते. गूळ, अद्रक, जलजीरा, सेंद्रिमीठ, लिंबू,हळद आयुर्वेदिक मसाला आदी प्रकारचा चहा ग्राहकांच्या मागणीनुसार देतात. त्यामुळे रामाजीचा चहा यवतमाळची विशेष ओळख आहे.