विदर्भात गारपीट; नाशकात ‌शिडकावा

म. टा. प्रतिनिधी, नाशिक दोन प्रकारच्या हवांचे मिश्रण होऊन निर्माण झालेल्या कमी दाबाच्या पट्ट्यामुळे रविवारी अमरावती जिल्ह्यात गारपीट झाली. चांदूर बाजार तालुक्यात रस्त्यांवर गारांचा थर साचला होता. तर नागपूर आणि वर्धा जिल्ह्यात हलक्या सरी कोसळल्या. येत्या दोन दिवसांत विदर्भातील ५० टक्के भागांत वादळी पावसाचा अंदाज आहे. दरम्यान, नाशिकमध्ये रविवारी पावसाच्या हलक्या शिडकाव्यामुळे नागरिकांना दिलासा मिळाला. येत्या दोन दिवसांत जिल्ह्यात पावसाच्या हलक्या सरी कोसळण्याची शक्यता व्यक्त करण्यात आली आहे. तर मार्चमध्ये गारपिटीचा अंदाज हवामान विभागाने आहे.

एकीकडे उकाड्याने घामाच्या धारा वाहू लागल्या असतानाच विदर्भ, उत्तर महाराष्ट्र दक्षिण महाराष्ट्र आणि मराठवाड्यात मात्र, पावसाच्या धारा लागल्या आहेत. विदर्भातील अमरावती आणि वर्धा जिल्ह्यात रविवारी गारपीट झाली. तर नागपूर जिल्ह्यात वादळी पाऊस झाला. जळगावच्या रावेरमध्येही रविवारी वादळीवाऱ्यासह गारपिटीचा तडाखा बसला. या अवकाळी पावसामुळे कांदा, द्राक्ष, डाळींब आणि रब्बी हंगामातील गहू पिकाचे मोठे नुकसान झाले आहे. तर जळगावच्या रावेर तालुक्यातील पाल परिसरात रविवारी दुपारी साडेचारच्या सुमारास वादळीवाऱ्यासह गारपिटीचा तडाखा बसला. सातपुडा पर्वतरांगेतील पाल परिसरात लिंबाएवढ्या गारा पडल्याने पिकांचे मोठे नुकसान झाले, तर गारबर्डी धरणाजवळ विजेच्या धक्क्याने एकाचा मृत्यू झाला.