१४ जून १९६७

कचऱ्यापासून खत

मुंबई - मुंबईतील कचऱ्यापासून महाराष्ट्रातील शेतीकरिता कंपोस्ट खत तयार करण्याची महापालिकेची योजना असून तिची बरीचशी पूर्वतयारीही आतापर्यंत झाली आहे. मुंबई शहर हे आता इतके वाढले आहे की महापालिकेस रोज सुमारे दोन हजार टन कचऱ्याची विल्हेवाट लावावी लागत आहे. या कचऱ्यापासून कंपोस्ट खत तयार करावे असा महापालिकेच्या इंजिनिअर्सचा गेल्या काही वर्षांपासून विचार सुरू आहे. सरकारनेही काही वर्षांपूर्वी असा नियम केला आहे की, प्रत्येक नगरपालिकेने शहरातून गोळा केलेल्या कचऱ्यांचे कंपोस्ट खत केले पाहिजे. परंतु या नियमाचे पालन म्हणजे अपवादच म्हणावा लागेल, असे म्हटले जाते. महापालिकेने धारावी येथील प्युरिफिकेशन प्लॅन्टजवळ कंपोस्टचा कारखाना तयार करण्याची योजना तयार केली आहे.

करमरकर कालवश

मुंबई - भारताचे एक थोर शिल्पकार विनायक पांडुरंग उर्फ नानासाहेब करमरकर आज पहाटे चेंबूर येथील आपल्या निवासस्थानी निधन पावले. मरणसमयी त्यांचे वय ७५ वर्षांचे होते. अलिकडे काही वर्षे ते चेंबूर येथे स्वतःचा स्टुडिओ बांधून राहात होते. पुणे येथील शिवाजी मिलिटरी स्कूलच्या पटांगणात छत्रपतींचा भव्य अश्वारूढ पुतळा तयार करून त्यांनी लहान वयातच नाव कमावले. यानंतर जमशेदपूर येथील सर जमशेटजी टाटा यांचा पुतळा व चौपाटीवरील विठ्ठलभाई पटेल यांचा पुतळा अशी दोन अत्यंत महत्त्वाची कामे त्यांनी पुरी केली. रवींद्र नाट्यमंदिरातील रवींद्रनाथ टागोर यांचा पुतळाही नानासाहेबांचाच.

बिनखात्याचे मंत्री

नवी दिल्ली - बिनखात्याचे मंत्री सत्यनारायण सिन्हा यांच्याकडे काय कामे आहेत, यासंबंधी आज राज्यसभेत अनेक हरकतीचे मुद्दे उपस्थित करण्यात आले व वादंग माजले. पंतप्रधान इंदिरा गांधी यांनी लोकनाथ मिश्र यांच्या प्रश्नास उत्तर देताना सांगितले की पंतप्रधानांकडून वेळोवेळी दिली जाणारी कामे बिनखात्याच्या मंत्र्यांनी करावयाची असतात.

सबनीस हे पठ्ठे बापूराव

मुंबई - वसंत सबनीस हे आजच्या काळातले पठ्ठे बापूराव आहेत, असे मत कवी कुसुमाग्रज यांनी शिवाजी मंदिरात बोलताना व्यक्त केले. दादा कोंडके आणि पार्टीने सादर केलेल्या वसंत सबनीसकृत "विच्छा माझी पुरी करा" या लोकनाट्याच्या द्विशतक महोत्सवी प्रयोगाचे अध्यक्ष म्हणून कुसुमाग्रज बोलत होते.