प्रवाशांनाच फटका

एसटी महामंडळाने लांब पल्ल्यांच्या मार्गावरील ६०० फेऱ्या बंद करण्याचा निर्णय घेतल्याने राज्यात विविध डेपोंमध्ये ७०० ते ८०० बसेस विनावापर उभ्या आहेत. तोटा कमी करण्यासाठी प्रवाशांना सेवा नाकारण्याचा हा प्रकार उद्वेगजनक आहे, अशी टीका सर्वसामान्यांनी केली आहे.

सेवा देणे ही सरकारची जबाबदारी

सार्वजनिक परिवहन सेवा ही सरकारची जबाबदारी आहे. परवडणाऱ्या दरांमध्ये सेवा देणे हा एसटी सेवेमागील हेतू आहे. फेऱ्या बंद करून त्यास हरताळ फासण्याचे काम केले जात आहे. तोटा होत असल्यास सेवा बंद करणे हा उपाय नाही. सरकारने आर्थिक सहाय्य करणे आवश्यक आहे.- आनंद विद्यासागर

फेऱ्या सुरू कराच

एसटीने यापद्धतीने सेवा नाकारणे योग्य नाही. एसटी फेऱ्या बंद केल्याने थेट फेऱ्यांच्या प्रवाशांना अवैध वाहतूक किंवा अन्य पर्याय स्वीकारावे लागत आहेत. ही बाब अन्यायकारक आहे. या फेऱ्या लागलीच सुरू करण्याची आवश्यकता आहे. - अभिजीत धुमाळ

देखभालीचीही समस्या येईल

सार्वजनिक वाहतूक व्यवस्थेत एसटी बळकट करण्याची आवश्यकता आहे. पण, बेस्टप्रमाणेच एसटीकडेही दुर्लक्ष सुरू आहे. चांगली सेवा दिल्यास, फेऱ्या वाढवल्यास महसुलात वाढ होईल. मात्र फेऱ्या बंद करण्यामुळे बसेसच्या देखभालीचीही समस्या निर्माण होईल.- संजय चव्हाण

एसटी वाचायला हवी

एसटीची सेवा ग्रामीण, दुर्गम भागात जाते. अशा पद्धतीने अन्य कोणीही सेवा पुरवू शकत नाही. एसटीला कमकुवत करण्याचा हा प्रयत्न आहे. या पद्धतीने एसटी सेवेचा बोजवारा उडत असल्यास ते चुकीचे आहे. त्यासाठी वेळीच प्रयत्न केले, तर एसटी वाचेल.- प्रशांत विश्वासराव

सबसिडी द्या

सर्वसामान्यांचे वाहन असणाऱ्या एसटीस सरकारने सबसिडी देणे आवश्यक आहे. जगभरात तीच पद्धत वापरली जाते. अशा पद्धतीने फेऱ्या रद्द करण्यात आल्याने शेकडो प्रवाशांना समस्येस तोंड द्यावे लागत आहे. एसटीच्या समस्येवर उपाय योजणे आवश्यक आहे.- अॅड. वैभव मोडक