मराठीसक्ती योग्यच!

राज्यातील इंग्रजी माध्यमाच्या शाळांमध्ये मराठी विषय अनिवार्य असून, सरकारचे धोरणसुद्धा तेच सांगते. मात्र या शाळांमधून मराठीऐवजी हिंदी किंवा फ्रेंच भाषांना प्राधान्य दिले जाते. हा प्रकार अयोग्य असून, अशा शाळांवर कठोर कारवाई करण्यात यावी, असे सामान्य मुंबईकरांचे म्हणणे आहे.

कर्नाटकचे अनुकरण व्हावे

महाराष्ट्रात राहणाऱ्यांना व येथील इंग्रजी शाळांमध्ये शिक्षण घेत असलेल्यांना मराठी भाषा येणे आवश्यक आहे. त्यामुळे ही भाषा शिकवण्याची सक्ती झाली पाहिजे. अन्य राज्यांमध्ये व प्रामुख्याने शेजारच्या कर्नाटकमध्ये कन्नड शिकणे अनिवार्य असल्याने येथेही तोच निकष लागू आहे.- प्रशांत पानसर

इंग्रजी, हिंदीही गरजेची

मुंबईत म्हाडाकडून भूखंड घेऊन मराठी शिकविण्याची हमी देणाऱ्या इंग्रजी माध्यमाच्या शाळा आहेत. त्यांमध्ये मराठी शिकविले जात नसल्याचे आढळून आल्यास त्यांच्यावर म्हाडातर्फे कारवाई होत नाही. महाराष्ट्रात मराठी शिकवली गेलीच पाहिजे, मात्र त्यासह इंग्रजी व हिंदी भाषासुद्धा असावी. - विवेकानंद गुप्ता

…अन्यथा कारवाई करावी!

मराठी ही महाराष्ट्राची मातृभाषा असल्याने सर्वांनीच तिचा आदर बाळगला पाहिजे. ही भाषा सक्तीची असावी व त्यानंतर अन्य भाषांचा पर्याय असावा. ज्या इंग्रजी माध्यमाच्या शाळांमध्ये मराठी शिकवली जात नसेल, त्यांवर कठोर कारवाई करावी. अन्यथा त्यांची हकालपट्टी केली जावी. - वसंत कांबळे

मराठीला प्राधान्य हवेच

मराठी ही पहिली भाषा असली पाहिजे व इंग्रजीसह अन्य भाषा दुय्यम ठेवाव्यात. राज्यात मराठीला दुय्यम स्थान दिले तर हा एकप्रकारे मराठीचा गळा घोटण्याचा व दुर्देवी प्रकार आहे. यानिमित्ताने सुभाष देसाई यांनी उ​पस्थित केलेला मुद्दा अत्यंत उचित असून त्यांचे अभिनंदन केले पाहिजे.- अजय घाटे