महागाईचा आलेख चढताच

महागाईने बेजार झालेल्या नागरिकांच्या दु:खावर फुंकर घालण्याऐवजी सरकारने त्यात सेवाकर, उपकराची फोडणी दिली आहे. त्यामुळे आतापर्यंत सेवाकराच्या कक्षेबाहेर असणाऱ्या घटकांवर कर बसला आहे. त्यातूनच महागाईचा ताण वाढतच चालल्याची चिंता व्यक्त केली जात आहे.

सेवाकराचा फटका सामान्यांना

सेवाकर हा अप्रत्यक्ष कराचा भाग असून त्याचा फटका सामान्यांनाच बसतो. केंद्राच्या खजिन्यात त्यामुळे भर पडणार आहे. हा महागाईचा एक प्रकार असून त्याचा संपूर्ण भार देशातील कोट्यवधी प्रवाशांवर पडणार आहे.

- अनिरुद्ध भावे

उपकराची व्याप्ती मोठी

उपकर वाढविण्याची मालिका सुरुच आहे. उपकराची रक्कम अल्प वाटत असली तरी त्याची व्याप्ती आणि प्रमाण पाहता त्याचा मोठा ताण पडत आहे. कर वाढवताना त्याचा कोणावर भार पडतो, याचाही विचार करायला हवा.

- हिरेन वोरा

निधी संबंधितांना द्या

सरकारच्या नवीन नियमामुळे रेल्वेचा फर्स्ट क्लास, एसीचा प्रवास महागणार आहे. ही वाढ सतत होत असून त्यातून रेल्वे वा बस महामंडळाकडे निधी जमा झाला तर प्रवाशांना किमान लाभ होईल. मात्र, ही रक्कम केंद्राकडे जाणार असून त्यांनी हा निधी संबंधित विभागास द्यायला हवा. - महेंद्र पाटील

काय साध्य होणार?

महागाई कमी होण्याऐवजी दिवसेंदिवस वाढतच चालली आहे. त्यात आता सेवाकर, उपकराची भर पडली आहे. गेल्या दोन वर्षांत अशा उपकरांचा भार लोकांना सहन करावा लागत आहे. त्यातच, सेवाकराचाही समावेश झाल्याने त्यातून काय साध्य होणार, ते अनाकलनीय आहे. - वैभव देशपांडे

महागाई रोखावी

सर्वच स्तरावर महागाई वाढत आहे. अशावेळी लोकांना दिलासा देण्याऐवजी सेवाकर, उपकराची भर पडली आहे. ही चिंतेची बाब असून महागाई रोखण्यासाठी तरी प्रयत्न करायला

हवेत.

- श्रद्धा मडव-मळगावकर