प्रकल्पांपुढे विविध आव्हाने

मुंबईतील सार्वजनिक वाहतूक व्यवस्थेच्या विकासासाठी मेट्रो, उन्नत मार्गांची घोषणा शनिवारी करण्यात आली. यापूर्वीही अशा मोठ्या घोषणा झाल्या असून, या प्रकल्पांसाठी निधी उभारणे, परवडणारे दर, प्रकल्प पूर्तता आदी आव्हाने असल्याची प्रतिक्रिया सामान्यांकडून व्यक्त होत आहे.

परवडणारे दर हवेत

प्रकल्प वेळेत होणे महत्त्वाचे असून, यापूर्वी विविध प्रकल्पांची किती प्रमाणात पूर्तता झाली हे पाहायला हवे. वाढती लोकसंख्या आणि वाहतुकीवरील ताण केव्हा कमी होणार याची प्रतीक्षा आहे. या प्रकल्पांचे दर मुंबईकरांना परवडणारे असतील तरच फायदा आहे.- चंद्रकांत घोसाळकर

प्रकल्प वेळेत पूर्ण व्हावेत

मुंबई व परिसरातील वाहतूक व्यवस्था सुधारण्यासाठी प्रकल्प वेळेत पूर्ण व्हायला हवेत. त्यांचे वेळापत्रक बिघडल्यास पुन्हा ये रे मागल्या होते. निधी उभारण्यापासून जमीन अधिग्रहणापर्यंत अनेक बाबी वेळीच सोडवायला हव्यात. शिवाय आधीच्या प्रकल्पांचा आढावाही घ्यायला हवा. - नितीन परमार

घोषणा नको कृती हवी

आतापर्यंत वाहतुकीच्या विकासासाठी बऱ्याच घोषणा झाल्या; परंतु अंमलबजावणी किती होते हे मुंबईकरांना ठावूक आहे. अजूनही मुंबईकर जीव धोक्यात घालूनच लोकलमधून प्रवास करतात. ही स्थिती बदलेल असे स्वप्न दाखवतानाच हा प्रवास सर्वसामान्यांना परवडेल असा हवा.- राजीव सिंघल

प्रकल्पांना कालमर्यादा हवी

प्रकल्पांची घोषणा होतानाच मागील प्रकल्प वेळेत पूर्ण झालेत आहेत का, याचाही आढावा घ्यायला हवा. आता प्रचंड खर्चाच्या प्रकल्पांच्या घोषणा झाल्या असून, त्यासाठी निश्चित कालमर्यादा असायला हवी. ते केवळ घोषणेपुरतेच न राहता प्रत्यक्षात यायला हवेत. - कैलाश वर्मा

तिकीट दर जास्त नकोत

नव्या प्रकल्पांतून दिल्या जाणाऱ्या सुविधांसाठी प्रवाशांकडून जादा शुल्क आकारले जाईल. परंतु तसे झाल्यास सर्वसामान्यांना या प्रकल्पांचा उपयोग काय? परवडणाऱ्या दरातील तिकीट ठेवले तरच लाखो प्रवाशांना फायदा आहे. नव्या सुविधा देताना याचे भान बाळगायला हवे.- अजय मुरचावडे