ठाण्यापुढे पर्यायी मार्ग हवाच

मध्य रेल्वेवर रुळांवरून लोकल घसरण्याच्या घटनांमध्ये वाढ झाली आहे. अशातच कर्जत, कसारा, अंबरनाथ, कल्याण आदी भागातून ठाणे वा त्यापुढे जाण्यासाठी रेल्वेशिवाय अन्य पर्याय नाही. आता तरी सरकारने समांतर रस्ता बांधण्याचा निर्णय घ्यावा, अशी मागणी होत आहे.

पर्यायी रस्ता केव्हा?

ठाण्यापुढील रेल्वे प्रवाशांना केवळ रेल्वेवर अवलंबून राहावे लागते. गुरुवारी विठ्ठलवाडी येथे रुळांवरून लोकल घसरल्याने सुरक्षिततेचा मुद्दाही पुन्हा एकदा पुढे आला आहे. ११ तास वाहतूक थांबणे ही गंभीर बाब आहे. आतातरी सरकारने लोकलला पर्याय उपलब्ध करून द्यावा. - संजय सावंत

ठाण्यापुढे दुर्लक्ष

सरकारने ठाण्यापुढील लाखो प्रवाशांचा विचार का केला नाही याचे आश्चर्य वाटते. या प्रवाशांना निव्वळ लोकलच्या वाहतुकीवर अवलंबून राहण्याची वेळ आलेली आहे. आधीच हा मार्ग प्रचंड गर्दीने ओसंडून वाहत असतो. एखादा समांतर मार्ग असेल, तर प्रवाशांचे हाल होणार नाहीत.- सुरेश कदम

अजूनही वेळ गेलेली नाही

गुरुवारची स्थिती पाहून आता तरी सरकारने पर्यायी मार्गाबाबत ​निर्णय घ्यावा. लोकलचा गोंधळ झाला की, या पट्ट्यातील लोकांनी काय करावे, हा प्रश्न नेहमीच निर्माण होतो. सरकारी पातळीवर त्याबाबत तातडीने विचार व्हायला हवा. - विजय मुरचावडे

आपत्कालीन स्थितीचे भान राखावे

मध्य रेल्वेवरील उपनगरांमधील लोकवस्ती वाढत आहे. त्यामुळे लोकल प्रवाशांची संख्याही वाढत आहे. एखादी दुर्घटना झाल्यास काय होते, ते गुरुवारच्या गोंधळातून दिसले आहे. आपत्कालीन स्थितीत अन्य पर्याय उपयुक्त ठरतात. त्याप्रमाणे लागलीच समांतर रस्ता बांधावा.- अॅड. वैभव मोडक

भविष्यात तरी हाल टळावेत

मध्य रेल्वेवर अनेकदा याप्रकारे दुर्घटना होतात. तेव्हा, यापुढे याबाबत काळजी घेण्याची आवश्यकता आहे. किमान भविष्यात तरी प्रवाशांचे पुन्हा हाल न होण्यासाठी सरकारने पावले उचलावीत. - गौरव घाग