घरग्राहकांची ओढाताण संतापजनक

म्हाडाच्या लॉटरीत घर मिळाले, त्यानुसार बँकेतून गृहकर्ज काढले. कर्जाचे हप्ते कापण्यास बँकेने सुरुवातही केली. पण प्रत्यक्षात घरांचा ताबा मिळालालेच नसल्याचा धक्कादायक प्रकार नुकताच समोर आला. घरग्राहकांच्या या फरपटीबद्दल मुंबईकरांनी संताप व्यक्त केला आहे.

आनंदावर विरजण

घरांची संपूर्ण रक्कम भरूनही हक्काच्या घरांचा ताबा मिळवण्यासाठी लॉटरी विजेते आठ महिन्यांपासून म्हाडाच्या पायऱ्या झिजवत आहेत. पालिकेच्या ओसीअभावी घरांचा ताबा रखडल्याने लोकांच्या आनंदावर विरजण पडले आहे. मुळात अत्यल्प गटातील व्यक्तींना पुन्हा पाठपुरावा करावा लागणे योग्य नाही. - आशा पवार

जबाबदारी कोण घेणार?

तीनशे चौरस फुटांच्या या घरांची क‌िंमत अठरा लाख रुपये आहे. १७० जणांनी बँकेतून गृहकर्ज काढून म्हाडाला संपूर्ण रक्कम दिली. पालिकेची ओसी न मिळाल्याने विजेते हवालदिल झाले आहेत. या सगळ्याची जबाबदारी कोण घेणार? त्यांची फरफट कोणाला दिसत नाही का? - भूमिका परब

भरपाई कशी होईल?

सुरुवातीला हे विजेते वैयक्तिक पातळीवर जाऊन म्हाडामध्ये पाठपुरावा करीत होते. पण त्याला दाद न मिळाल्याने त्यांनी एकत्र पाठपुरावा सुरू केला. मात्र अजूनही घराचा ताबा नाही. अल्प उत्पन्न गटातील या विजेत्यांचा दरमहा हप्ता कापला जात आहे. या सगळ्याची भरपाई कशी होणार ? - प्रथमेश राणे

प्रत्येक गोष्टीत टोलवाटोलवी

विजेत्यांनी एकत्रितपणे म्हाडाच्या अधिकाऱ्यांची भेट घेतली. मार्केटिंग व इंजिनीअरिंग विभागातील अधिकाऱ्यांना भेटून लेखी निवेदन दिले. पण लवकरच पालिकेची ओसी मिळेल, हेच आश्वासन म्हाडा अनेक महिन्यापासून देत असल्याचे या विजेत्यांचे म्हणणे आहेत. प्रत्येक गोष्टीत किती टोलवाटोलवी करणार? - मिता मंत्री

मार्ग काढा

प्रत्येक जण तडजोड करून घर घेत असतो. अशा प्रकारे टोलवाटोलवी करून म्हाडा आणि पालिका लोकांना किती त्रास देणार? हे योग्य आहे का? अशी परिस्थिती का उद्भवते? यातून काय पर्याय काढण्यात येणार आहे? लवकरात लवकर यातून मार्ग निघायला हवा. - संतोष चव्हाण