उत्सवात कायदे पायदळी

उत्सवातील बडेजाव, मंडळांमधील स्पर्धा, भक्तांना आकर्षित करण्याकरीता केले जाणारे प्रयत्न आदींमुळे त्याला राजकीय रंग चढतो. त्यातून उत्सवाचे पावित्र्य धोक्यात येऊन नियमांना पायदळी तुडवले जाते. त्यातून होणारी कारवाई, सर्वसामान्यांना होणारा त्रास याबाबत सामान्यांच्या प्रतिक्रिया....

निष्पक्ष कारवाई व्हावी

प्रत्येक नाण्याला दोन बाजू असतात. त्यानुसार कोणत्याही सण, उत्सव आदींवर कारवाई करण्याआधी ती बाजू तपासून घ्यावी. तसेच, मंडळांना पर्याय उपलब्ध करून द्यावेत. त्यातून नियमनाचे उल्लंघन होणार नाही, याबाबत दक्षता घ्यावी. - स्मिता खरे

स्थानिकांची हुकूमशाही

अरूंद रस्ता असल्यास निदान एक रुग्णवाहिका जाण्याइतकी जागा उत्सवादरम्यान कोणत्याही रस्त्यावर उत्सव आयोजकांनी सोडायला हवी. त्यातच औद्योगिक परिसरातील रस्ते कोणत्याही प्रकारे अडवू नयेत. त्यामुळे उत्सवाच्या १० दिवस आधी व नंतर रस्त्यावर स्टेज ठेवल्यास कायम उद्योजकांचे नुकसान होते. - एकनाथ सोनावणे

प्रशासनाने कार्यवाही करावी

रस्ते चालण्यासाठीही उपलब्ध होत नाहीत. त्या रस्त्यावर दडपशाहीने रस्ते खोदून, अडवून, सोसायट्यांची गेट बंद करून, नवसाला पावणारा अशी अंधश्रद्धा पसरवून, सर्व नियम धाब्यावर बसवून सण साजरे करणे अयोग्य आहे. प्रशासनाने कोणाचाही मुलाहिजा न ठेवता कार्यवाही करावी. - नीलेश आंबेरकर

मंडळांचे ऑडिट करा

गणेश मंडळांची वाढती संख्या बघता कुठेतरी त्याला अटकाव करण्यासाठी सरकारने एखादी योजना आखावी. गणेश मंडळांकडून सामाजिक भान, समाजासाठी उपयोगी उपक्रम राबवले जातात का आदींचे ऑडिट करून पुढच्या वर्षी त्यांना परवानगी द्यावी की नाही, हे ठरवावे आणि जी कारवाई असेल ती काटेकोरपणे केली जावी. - किरण वाघमारे

कायद्यात विषमता नको

सर्व कायदे, नियम व अटी नेहमी विशिष्ट धर्माच्या सणाला का लावले जातात? काही धर्मियांकडून प्रार्थनेच्या नावाखाली आठवड्यातून एकदा रस्ते अडवले जातात, त्यावर कारवाई होत नाही. मशिदींवरील भोंगे उतरवा असा सर्वोच्च न्यायालयाचा आदेश आहे. मात्र याही आदेशाचे पालन होत नाही. - शार्दुल म्हाडगुत