तांदळाची स्वादिष्ट खीर

खीर सगळ्यांनाच आवडते. पण सगळ्यांना आवडणारी ही खीर बहुतांशी शेवयांची असते. याउलट तांदळाची खीर म्हटली की अनेक जण नाक मुरडतात. कारण ही खीर त्यांना भातासारखी लागते. पण खरं सांगायचं, तर तांदळाच्या खिरीची लज्जत काही वेगळीच असते. सगळं प्रमाण नीट जुळून आलं, तर तांदळाची खीर एकदम चविष्ट होते... सध्या पितृ पंधरवडा सुरू आहे आणि सर्वपित्रीच्या जेवणात परंपरा म्हणून तांदळाची खीर करण्याची पद्धत आहेच. म्हणून मुद्दाम तांदळाच्या खिरीचीच साधी आणि सोपी पाककृती सांगते-

साहित्य - एक वाटी बासमती किंवा आंबेमोहोर तांदूळ, पाव किलो साखर, अर्धा लिटर दूध, दोन चमचे तूप, दहा-बारा वेलची, अर्धी वाटी काजू-बदाम-चारोळी-मनुका आणि रंगासाठी केशर, किंवा दूध-केशर-साखरे ऐवजी रेडिमेड मिल्कमेडही चालेल.

कृती - प्रथम तांदूळ स्वच्छ धुऊन दहा मिनिटं निथळत ठेवावे. नंतर एका पातेल्यात तूप गरम करुन ते तुपावर छान परतून घ्यावेत. परतल्यावर एका पातेल्यात चार वाट्या पाणी आणि तांदूळ घेऊन ते कुकरमध्ये शिजवून घ्यावेत. शिजून थंड झाल्यावर ते रवीने घोटावेत. यानंतर एका जाड बुडाच्या पातेल्यात अर्धा ते पाऊण लिटर दूध घेऊन ते गरम करावे. गरम झाल्यावर त्यात साखर, काजूचे तुकडे, बदामाचे काप, चारोळी, मनुका व केशर टाकून एक उकळी आणावी. त्यानंतर घोटलेला तांदूळ त्या दुधात टाकून मंद आचेवर दहा मिनिटं ठेवावा. मधेमधे ढवळत राहावं, त्यामुळे खीर तळाला करपत नाही आणि चांगली एकजीवही होते. खिरीचं मिश्रण साधारण घट्ट झाल्यावर गॅस बंद करावा.
ही खीर शरीरासाठी थंड असते. त्यामुळे अधेमधे करायलाही हरकत नाही.

- वैशाली बागवे, कांदिवली