​ अळूची पातळ भाजी

शुभांगी फडके, ठाणे

साहित्य- भाजीच्या अळूची १२-१५ पाने, अर्धी वाटी चणाडाळ व अर्धी वाटी शेंगदाणे (दोन तास भिजत घातलेली), अर्धी वाटी चिंचेचा कोळ, एक वाटी गूळ, पाव वाटी काजू तुकडे, अर्धी वाटी ओल्या खोबऱ्याचे काप, चार-पाच सुक्या लाल मिरच्या तुकडे करून, कडूलिंब आठ-दहा पाने चिरून, एक टीस्पून मेथी दाणे, अर्धी वाटी बेसन पीठ, फोडणीसाठी तेल, मोहरी, हळद, हिंग, मक्याचे अर्धा इंच जाडीचे काप

कृती- अळूची पाने धुऊन घेऊन बारीक चिरून घ्या. त्याची देठी सोलून बारीक करून घ्या. एका मोठ्या उभ्या डब्यामध्ये भिजलेले डाळ, दाणे घालून त्यावर अळूची पाने व देठी घालवी. त्यावर चिंचेचा कोळ घालून वर कणसाचे काप ठेवावेत. हा डबा कुकरमध्ये ठेवून शिजवावा. नंतर मोठ्या पातेल्यात तेल गरम करून एक चमचा मेथी दाणा, एक चमचा मोहरी, हळद, हिंग लाल मिरच्यांचे तुकडे, कढीपत्ता, खोबऱ्याचे काप, काजू आणि उकडलेली कणसे घालून परतून घ्या. त्यात घोटलेली भाजी घालून बेसन पाण्यात कालवून ते घाला. गूळ, चवीप्रमाणे मीठ व लाल मिरची पावडर घालून उकळा. चांगली उकळली की गॅस बंद करा. ही भाजी आंबट-गोड-तिखट अशी चविष्ट लागते. भात, पोळी वा भाकरी सर्वांसोबत खायला मस्त लागते.

टीप- भाजीत चिंच असल्यामुळे गूळ जरा जास्त घालावा.