कारल्याचं रायतं

वसुंधरा साळकर, कळवा

‘कारलं तुपात तळलं, साखरेत घोळलं तरी कडू ते कडू’ अशी म्हण प्रचलित आहे. पण कारलं कडू असलं तरी मधुमेहासारख्या रोगावर ते अत्यंत गुणकारीही आहे. याच कारल्यापासून रुचकर खाद्यपदार्थही तयार केले जातात. त्यातील एका खाद्यपदार्थाची पाककृती पुढीलप्रमाणे-

साहित्य- ४/५ कारली, गूळ, चिंच, मोहरी, हिंग, ओलं खोबरं, तेल, तूप व मीठ

कृती- कारली बारीक कापून घ्यावी व मीठ लावून अर्धा तास ठेवून द्यावी. नंतर कारल्याचा कीस धुवून मीठाचं पाणी पिळून टाकावं. कीस तव्यावर खरपूस भाजून घ्यावा, तसंच ओल्या खोबऱ्याचा वाटीभर कीस तेलावर परतून घ्यावा. एक चमचा मोहरीही भाजून घ्यावी. नंतर तिन्ही पदार्थ मिक्सवर जाडसर वाटून घ्यावे. वाटताना गूळ कीसून घालावा. चवीपुरतं तिखट (मिरची पूड), मीठ व चिंचेचा कोळ घालावा. कढईत हिंग, राईची तुपात फोडणी करून हे मिश्रण त्यात ओतावं. एक उकळी काढून खाली उतरवावं. जेवणाबरोबर तोंडी लावणं किंवा चपातीबरोबर खाण्यास फारच छान लागतं.