चिली रोझ पॅनाकोटा

आरती निजापकर, सायन

पॅनाकोटा हा मुळात इटालियन पदार्थ असून तेथील बहुतांश लोकांचा हा आवडता गोड पदार्थ आहे. शिवाय यात दूध आणि क्रीम असल्यामुळे हे पौष्टिक देखील आहे. या गोड पदार्थाच्या पाककृतीत थोडा बदल करुन चिली रोझ पॅनाकोटा हा पदार्थ आपण बनवणार आहोत.

साहित्य- २०० मिली दूध, ४०० मिली डबल क्रीम, १२० ग्रॅम साखर, एक लहान चमचा व्हॅनिला इसेन्स, एक मोठा चमचा जिलेटीन, १/३ वाटी रोझ सिरप, एक लहान चमचा टबास्को सॉस (मिरची सॉस), मीठ अगदी किंचित, पुदिन्याची पानं सजावटीसाठी, रोझ सिरप सजावटीसाठी

कृती- सर्व प्रथम जिलेटीन पाण्यात घालून ठेवा. आता एका सॉसपॅनमध्ये दूध आणि डबल क्रीम साखर हे एकत्र करून घ्या. नंतर मंद आचेवर सॉसपॅन ठेवून दुधाचं मिश्रण गरम करा. ते सतत ढवळत राहा. उकळी येऊ देऊ नये आणि मिश्रण सॉसपॅनला चिकटणार नाही, याचीदेखील खबरदारी घ्या. साखर विरघळेपर्यंत ढवळत राहा. ही सर्व कृती मंद आचेवरच करायची आहे. आता दुसरीकडे जिलेटीनमधलं पाणी काढून टाका आणि जिलेटीन दुधात घालून एकत्र करून घ्या. मंद आचेवर जिलेटीन विरघळेपर्यंत ढवळत राहा. जिलेटीन पूर्णपणे विरघळलं की गॅस बंद करा. नंतर हे मिश्रण कोमट करत ठेवा. ते कोमट झालं की त्यात व्हॅनिला इसेन्स, टबास्कोचे थेंब आणि किंचित मीठ घाला. हे मिश्रण एकत्र करून घ्या. गार झालेलं पॅनाकोटाचं मिश्रण यात घालून घ्या. पॅनाकोटासाठी घेतलेले मोल्ड किंवा डेझर्ट ग्लासमध्ये तळाला रोझ सिरप घाला आणि ते फ्रीजरमध्ये सेट करायला ठेवा. नंतर पॅनाकोटाचं मिश्रण साच्यात किंवा ग्लासमध्ये घालून फ्रीजरमध्ये दोन ते तीन तास सेट करायला ठेवा. पॅनाकोटा तयार झालं की सजावट करून थंडगार सर्व्ह करा.

टीप- रोझ सिरप पॅनाकोटाच्या मिश्रणात घालू शकता