​ चिवईच्या भाजीचा झुणका

लतिका देशमुख, बदलापूर

साहित्य- पाव किलो चिवईची भाजी साफ करून बारीक चिरलेली, दोन कांदे, बेसन पीठ आवश्यकतेनुसार, लसूण, हळद, मीठ, मोहरी, जिरे, हिंग, तेल, लाल तिखट, गरम मसाला अर्धा चमचा.

कृती- प्रथम एका कढईमध्ये तेल गरम करायला ठेवावं. तेल गरम झालं की मोहरी, हिंग, जिरे, लसूण यांची फोडणी द्यावी. त्यानांतर कापलेला कांदा तेलात परतून घ्यावा. कांदा छान परतला की, मग त्यात हळद, लाल तिखट दोन ते तीन चमचे, गरम मसाला व मीठ घालून त्यात चिवईची भाजी घालून परतून घ्यावी आणि कढईवर झाकण ठेवावं. भाजी शिजली की वरून बेसन पीठ घालून परतत राहावं. बाजूने थोडे तेल सोडावं. आपणास पाहिजे तसा झुणका कोरडा किंवा ओलसर ठेवावा. झुणका एका भांड्यात काढून त्यावर तेल घालून कांदा, मुळा, कढी,पन्ह या बरोबर सर्व्ह करावं. भाकरी, पोळी कशासोबतही खाऊ शकता.

टीप- ही भाजी नेहमी मिळत नाही आणि बऱ्याच जणांना याविषयी माहीत नाही. परंतु ही भाजी अत्यंत चविष्ट असून तिच्यापासून वड्या, पातळ भाजी, पराठाही करता येतो.