उपवासाचा मालपुवा

आरती निजापकर, सायन

साहित्य- अर्धा वाटी शिंगाडा पीठ, एक मोठा चमचा वरीचं पीठ, एक लहान चमचा वरीचे तांदूळ, मीठ किंचित, पाव वाटी पाणी किंवा आवश्यकतेनुसार, तूप, १/३ वाटी गूळ, एक वाटी पाणी, बदाम-पिस्ते-केसर सजावटीसाठी

कृती- प्रथम एका भांड्यात शिंगाडा पीठ, वरीचं पीठ आणि किंचित मीठ घालून एकत्र करून घ्यावं. त्यात थोडं-थोडं पाणी घालावं. नंतर व्यवस्थित एकजीव करून त्यात वरीचे तांदूळ घालावेत. मिश्रण एकत्र करून दहा मिनिटं बाजूला ठेवून द्या. आता खोलगट पण पसरट पॅन किंवा कढईत तूप तापवून घ्या. मध्यम आचेवर ठेवून त्यात चमच्याच्या साहाय्याने ते मिश्रण घाला. ते दोन्ही बाजूंनी सोनेरी रंग येईपर्यंत चांगलं खरपूस तळून घ्या. अशाप्रकारे सर्व मालपुआ तळून घ्यावे. नंतर दुसऱ्या एका भांड्यात पाणी गरम करून त्यात गूळ घालून चांगला पाक बनवून घ्यावा. गरमागरम मालपुवा गुळाच्या पाकात घालून घ्या. ते व्यवस्थित घोळवून घ्या म्हणजे मालपुआ पाक शोषून घेईल.

सर्व मालपुवा पाकातून काढून घ्या. नंतर ते एका ताटात ठेवून त्यावर बदाम पिस्ते आणि केसर घालून सजवा.