पारंपरिक ‘मोकळ’

सकाळी नाश्त्यासाठी काय करायचं हा प्रश्न सर्वच गृहिणींना नेहमी पडत असतो आणि त्यातून तो पदार्थ कमी वेळेत झटकन, पटकन होणार असेल तर फारच छान! म्हणूनच मोकळ, मोकळी भाजणी किंवा ‘उकड पेडीं’ अशा अनेक नावांनी ओळखला जाणारा पदार्थ मी सुचवत आहे. कोकणातील हा एक पारंपरिक पदार्थ आहे. महत्त्वाचं म्हणजे हा पदार्थ पौष्टीक, हलका आहे आणि करायला वेळ फारच कमी लागतो. त्यात पोटभरीचा आहे. मुलांचं वाढीचं वय असतं, तर त्यांना डब्यातही देता येतो.

साहित्य : थालीपीठाची भाजणी चार वाट्या, कांदे चार-पाच, दोन चमचे तिखट, चवीपुरतं मीठ, तेल, अर्धा चमचा ओवा, हळद, हिंग चवीप्रमाणे, एक वाटी खवलेलं ओलं खोबरं, अर्धी वाटी चिरलेली कोथिंबीर, पाव वाटी दही किंवा आंबट ताक.

कृती : प्रथम कांदे बारीक चिरुन घ्या, परातीत थालीपीठाची भाजणी घालून थोडं पाणी घालून भाजणी ओली करा. जास्त पाणी घालू नये, फक्त भिजण्याए‌ढी घाला. त्यानंतर तेल कडकडीत तापल्यावर राई, हिंग, हळद घालून खमंग फोडणी तयार करा. मग त्यात कांदा परतून घ्या. कांदा शिजला की त्यात मीठ घाला आणि नंतर भिजवलेली भाजणी घाला, झाकण ठेवून वाफ द्या. त्यानंतर ताकाचा हबका मारुन परत झाकण ठेवून परता, ताक घातल्यामुळे त्याला आंबटसर चव येते व खायलाही छान लागते.

टीप - ‘मोकळ’साठी थालीपीठाची कोणतीही भाजणी घेतली तरी चालेल, म्हणजे ज्वारीबाजरीची किंवा तांदूळ-चणे घालून केलेली भाजणीही चालते.

- अनुराधा नातु, डोंबिवली