मूगाचे कटलेट

साहित्य : अर्धा कप मूग, अर्धा कप सोया ग्रॅन्युअल्स, एक मध्यम आकाराचा बटाटा उकडून स्मॅश करून घ्यावा. अर्धा कप ब्रेड क्रम्स. बारीक चिरलेल्या दोन हिरव्या मिरच्या, एक टीस्पून लसूण पावडर, एक टीस्पून जिरं, अर्धा टीस्पून गरम मसाला, अर्धा ते एक टीस्पून चाट मसाला, चवीपुरतं मीठ, तेल

महाराष्ट्र टाइम्स.कॉम

कृती -
० मूग १० तास भिजवून घ्यावेत. त्यातले कडक राहिलेले मूग काढून टाकावेत. मोड येण्यासाठी साधारण ६ ते ८ तास सुती कपड्यात बांधून ठेवावेत. मोड आलेले मूग प्रेशर कूकरमध्ये दोन शिट्ट्या करून शिजवून घ्यावेत. मूग शिजवताना त्यात जास्त पाणी घालू नये. अगदी थोडंच पाणी घालावं. तसंच मीठ घालावं.

० सोया ग्रॅन्युअल्स उकळत्या पाण्यात घालून ५ मिनिटं शिजवावेत. गार झाल्यावर ग्रॅन्युअल्स पिळून घ्यावेत.

० एका मोठ्या वाटीमध्ये शिजवलेले मूग, सोया ग्रॅन्युअल्स, ब्रेड क्रम्स, शिजवलेला बटाटा, गार्लिक पावडर, जिरे, गरम मसाला, चाट मसाला, हिरव्या मिरच्या आणि चवीनुसार मिठ असे घालून मिक्स करावे. मध्यम आकाराचे पॅटीस बनवा.

० तवा तापवावा. प्रत्येक पॅटीसला तेल लावून तव्यावर मध्यम आचेवर लालसर होईपर्यंत ठेवावेत. हे पॅटीस बर्गरमध्ये खूप छान लागतात.

टीप
० जर लसूण पावडर नसेल तर लसूणपेस्ट पाव टीस्पून तेलात परतून घ्यावी आणि मग वापरावी.

वैदेही भावे, फूड ब्लॉगर