पौष्टिक दिलखुश सलाड

श्रेया राजवाडे, गोरेगाव

हल्ली आपण सगळेच आहाराविषयी अधिक जागरूक झालोत. धावपळीच्या दिनक्रमात आपल्याला एक परिपूर्ण, झटपट होणारा आणि त्याचवेळी अतिशय रुचकर पर्याय हवा असतो. दिलखुश सलाड हा असाच एक प्रकार आहे. जीवनसत्व आणि प्रथिनांनी परिपूर्ण असलेल्या दिलखुश सलाडची पाककृती पुढीलप्रमाणे...

साहित्य- एक सफरचंद, अर्धी वाटी डाळिंबाचे दाणे, अर्धी वाटी अक्रोड आणि बदाम, अर्धी वाटी पनीर, अर्ध्या लिंबाचा रस, काळं मीठ, धुऊन बारीक चिरलेली कोथिंबीर.

कृती- सफरचंद धुऊन त्याचे लहान चौकोनी तुकडे करा. त्यात अर्धी वाटी डाळिंबाचे दाणे, अर्धी वाटी पनीरचे चौकोनी तुकडे, अर्धी वाटी अक्रोड-बदामाचे तुकडे, चवीप्रमाणे काळं मीठ, अर्ध्या लिंबाचा रस आणि बारीक चिरलेली कोथिंबीर घालून हलक्या हाताने ढवळा. अशा प्रकारे पौष्टिक दिलखुश सलाड तयार आहे. डाळिंब आणि लिंबाच्या रसाने आंबट चव येते.

टीप
- हे सलाड बनवल्यानंतर लगेच खावं.
- ऑफिसमध्ये डब्यात नेण्यास योग्य नाही.