मोहन देऊलकर, गिरगाव
गिरगाव येथील बेडेकर सदन, शांताराम चाळ आणि मालिनी ब्लॉक्स सोसायटीचे रहिवासी अगदी गुण्या गोविंदानं राहतात. यातील ज्येष्ठ मंडळी ते लहानग्यांमध्ये मैत्रीपूर्ण नातं आहे. यातील तरुण तुर्क सर्वश्री बंधूद्वय नवरे, फडके, कणेरी, चावडा, सावरकर, दहित आणि गुरव या सर्वांचा वाडीत साजऱ्या होणाऱ्या उत्सवात सक्रीय भाग असतो. वाडीत साजरा करण्यात येत असलेल्या अनेक उत्सवांपैकी सर्वप्रथम राष्ट्रीय उत्सव म्हणजे स्वातंत्र्य दिन आणि प्रजासत्ताक दिनी होणारे ध्वजवंदन. त्यानंतर साजरे होणारे उत्सव म्हणजे जन्माष्टमी, गणेशोत्सव, नवरात्रौत्सव, दसरा, होळी हे सगळं पारंपरिक पद्धतीनं साजरा केलं जातं.
गणेशोत्सवाची तयारी एक महिन्यापासून सुरुवात करताना प्रत्येकजण मदत करत असतो. त्याचप्रमाणे हनुमान जयंती भव्य प्रमाणात साजरी केली जाते. हे सर्व किशोर गुरव यांच्या मार्गदर्शनाखाली संपन्न होत असताना त्याच्या मदतीला सर्वश्री दुर्गेश रेगे, सचिन घेवडे, प्रदीप मेस्त्री, सत्यवान भोसले, चिराग शहा, शैलेश गुरव, मया मेस्त्री, निलेश श्रीमणी, हर्मोश वैद्य, पुष्कर गोडबोले, देवव्रत फडके, पुंडे, आठवले, जुवळे, संतोष बागाव, कुशल जोशी हे सर्व तरुण त्यांना मदत करण्याकरता सदैव तत्पर असतात. या कट्टा गँगचा वाडीतील समस्त रहिवाशांना आधार वाटतो. कारण त्यांच्या सुख-दुःखात समरस होऊन त्यांना वेळप्रसंगी आर्थिक मदतही केली जाते. त्यांच्यात भांडणतंटे नाहीत की रुसवे-फुगवे नाहीत. सगळेजण आत्मीयतेनं काम करत असतात. याचा प्रत्यय गणेशोत्सव आणि हनुमान जयंतीच्या उत्सवात येतो. याचं कारण प्रत्येकजण एकमेकांच्या सहकार्यानं कार्यरत असतो. याचा प्रत्यय वाडीचे मालक वसंत बेडेकर आणि कुटुंबीयांतर्फे संपन्न होणारा सात दिवसांचा मार्गशीर्ष महोत्सव. त्यावेळी तहानभूक विसरून आपआपली कामं मन लावून करण्यात धन्यता मानतात.
वरील सर्व उत्सव संपन्न करताना एकमेकांबद्दल आत्मिक ओढ, प्रेम, आपुलकी आणि जिव्हाळा असून कुणाशीही स्पर्धा नाही. ध्येय निश्चिती, योगदान आणि शिस्त या तीन गोष्टींचा अवलंब केल्यानं संपूर्ण कार्यात यश मिळण्याची सर्वांना शंभर टक्के खात्री वाटते. त्याचप्रमाणे ऋणानुबंधाच्या या कट्ट्यावर सर्वजण एवढे घट्ट बांधले गेले आहेत की 'एकमेका साहाय्य करू, अवघे धरू सुपंथ' या म्हणीचा प्रत्यय आणून देतात आणि त्यातच सर्वजण इतिकर्तव्यता मानतात. अशी ही आमच्या वाडीतील तरुण तुर्क कट्टा गँग गुण्यागोविंदानं कार्यरत रहावी हीच ईश्वरचरणी प्रार्थना.