खमंग उकडपेंडी

सर्वच पती-पत्नींच्या संसारातील नाजूक संवाद म्हणजे- 'आमच्या आईच्या हातच्या पदार्थांची चव...', आणि मग त्यानंतरचे 'प्रेमळ' संवाद! बापरे!

तरीही माझी आई द्वारकाबाई खरोखर सुगरण! आज वय ८४ वर्षं! तरी अजूनही काही पदार्थ ती स्वत: बनवते आणि त्या पदार्थांची चव खास तिचीच असते. उदाहरणार्थ कळण्याची जाड खरपूस पोपड्याची भाकरी, उकडपेंडी, हातावरील सूतासारख्या शेवया हे तिचे वैशिष्ट्यपूर्ण पदार्थ... ते तिच्याशिवाय दुसऱ्या कुणाच्या हातचे खावेसेच वाटत नाही!

यापैकी 'उकडपेंडी' हा तसा आईच्या माहेरचा, चांदूरबिस्वा, विदर्भातील अत्यंत चविष्ट पदार्थ! आईच्या हातच्या या पदार्थाची चव निव्वळ अविस्मरणीय... म्हणून त्याचीच पद्धत बघू या!

साहित्य:- १ वाटी जाडसर बट्टीची कणिक (किंवा रवा), १ वाटी खाद्यतेल, २ लहान कांदे, १ चमचा तिखट, जिरे, मोहरी, लसूण, हळद, मीठ.

कृती:- प्रथम वाटीभर तेल कढईत तापवा, जिरे, मोहरीची फोडणी देऊन लसूण घालून लालसर होऊ द्या. नंतर बारीक चिरलेला कांदा, तिखट, हळद, मीठ टाकून परतवून घ्या. मग त्यात जाडसर कणिक टाकून ती चांगली भाजून द्या. कणिक भाजल्याचा छान दरवळ सुटेल. नंतर ग्लासभर पाणी टाकून एकजीव होईपर्यंत ते मिश्रण नीट ढवळा. हलकासा गोळा तयार झाल्यावर तेल सुटलेलं दिसायला लागेल. त्यावर बारीक कोथिंबीर टाकून झाकण ठेवा. वाफ धरल्यानंतर प्रसन्नसा सुगंध घरभर दरवळेल, आणि? यस् 'उकडपेंडी' इज रेडी!

- नरेंद्र शांताराम कासार