शलाका एडेकर, अंधेरी
साहित्य- चार बटाटे, चार ब्रेडचे स्लाइस, एक वाटी बारीक चिरुन वाफवलेल्या भाज्या (गाजर, फरसबी, सिमला मिरची, कोबी, वाटाणा, बीट) किंवा एक वाटी वाफवलेलं मिक्स कडधान्य किंवा बारीक चिरलेला पालक किंवा शेपू, मीठ, लिंबाचा रस, बारीक चिरलेली हिरवी मिरची, कोथिंबीर, दोन चमचे मक्याचं पीठ, दोन चमचे रवा, तळण्यासाठी तेल,
कृती- प्रथम बटाटे उकडून कुस्करून घ्यावेत. नंतर ब्रेड स्लाइसही कुस्करुन घ्यावेत. एका बाऊलमध्ये कुस्करलेले बटाटे आणि ब्रेड, आवडीप्रमाणे वाफवलेल्या भाज्या किंवा कडधान्य किंवा पालेभाज्या, मीठ, लिंबाचा रस, बारीक चिरलेली हिरवी मिरची आणि कोथिंबीर हे सर्व साहित्य एकत्र करुन घ्यावं. आता या मिश्रणाचे चपटे गोळे बनवून ते मक्याचे पीठ आणि रवा एकत्र करुन त्यामध्ये घोळवून घ्यावेत. नंतर तांबूस रंग येईपर्यंत तळून घ्यावेत किंवा खरपून भाजून घ्यावेत. अशी ही चवदार आलू टिक्की पुदिन्याच्या चटणी, दही, चिंच चटणी किंवा सॉससोबत गरमा गरम सर्व्ह करावी.