दुधीभोपळ्याचे कटलेट

ममता जोशी, ठाणे

बऱ्याचदा बघितलं आहे की दुधीभोपळा खायला लहानांना काय मोठ्यांना देखील आवडत नाही. नाक मुरडलं जातं. परंतु त्यात खूप जीवनसत्त्व असल्यानं तो खाणं आपल्या शरीराकरता गुणकारी असतं. ही पाककृती बनवून बघा सगळे मिटक्या मारत खातील व पुन्हा कर ही मागणी ही करतील. या पदार्थाची पाककृती पुढीलप्रमाणे-

साहित्य- (हे साहित्य ७-८ कटलेट बनविण्यासाठी आहे) २५० ग्रॅम दुधीभोपळा (कीसून व दाबून पाणी काढलेला), एक मोठा चमचा तांदळाचं पीठ, एक मोठा चमचा कॉर्न फ्लोर, एक मोठा चमचा दाण्याचा कूट (अगदी बारीक नको), दोन चमचे ब्रेडचा चुरा, १/२ छोटा चमचा ओवा, १/२ चमचा लाल तिखट (आवडीनुसार कमी/ जास्त), १/२ चमचा हळद, १/२ चमचा धणे-जिरे पूड, १/२ चमचा आले कीसून, एक हिरवी मिरची बारीक चिरून, चवीनुसार मीठ, १ व १/२ चमचा रवा, दोन चमचे तेल आणि कटलेट तळून घ्यायला तेल.

कृती- सगळ्यात आधी किसलेल्या दुधीभोपळ्याला पिळून त्याचा रस बाजूला करा. (तो तुम्ही आमटी/ सूप/ परोठ्यामध्ये वापरू शकता). किसलेल्या दुधीभोपळ्यात वरील सर्व साहित्य (पॅन फ्राय साठी तेल व रवा सोडून) मिळवून गोळा तयार करा. गोळा सैल वाटत असल्यास त्यात अजून दाणे कूट व बेसन मिसळू शकता. आता याचे छोटे-छोटे ७-८ भाग करून त्यांना गोल करा. एका ताटामध्ये रवा पसरा व प्रत्येक गोळा त्यावर ठेवून दाबून थोडा चपटा करा. एका नॉनस्टिक पॅन वर थोडं तेल गरम करा व हे कटलेट खमंग होईपर्यंत भाजून घ्या (चालत असल्यास तळून देखील घ्या). हिरवी चटणी किंवा टोमॅटो सॉस सोबत खायला द्या.