मेथी पालक क्रिस्पी

आरती निजापकर, सायन

साहित्य- एक वाटी गव्हाचं पीठ, एक मोठा चमचा तांदळाचं पीठ, पाव वाटी बारीक चिरलेला पालक, पाव वाटी बारीक चिरलेली मेथी, एक मोठा चमचा बारीक चिरलेली कोथिंबीर, एक लहान हिरवी मिरची, एक मोठा चमचा पांढरे तीळ, अर्धा लहान चमचा ओवा, मीठ, एक लहान चमचा लाल तिखट, पाव लहान चमचा हळद, पाव लहान चमचा गरम मसाला, पाणी, तेल

कृती- एका खोलगट भांड्यात चिरलेला पालक, मेथी, हिरवी मिरची, कोथिंबीर, लाल तिखट, हळद, गरम मसाला, तीळ, ओवा आणि मीठ हे सर्व एकत्र करून घ्या. नंतर गव्हाचं आणि तांदळाच पीठ त्यात घाला. आता यात आवश्यकतेनुसार पाणी घालून मध्यमसर मळून घ्या आणि आठ ते दहा मिनिटं झाकून ठेवा. तोपर्यंत गॅसवर कढईत तेल घेऊन मध्यम आचेवर तापवत ठेवा. आता कणकेचे गोळे घेऊन त्याला थोडंसं सुकं पीठ लावून ते पातळ लाटून घ्या. मग आवडत्या आकाराच्या कटरने कापून घ्या. तेल तापलं की, त्यात लाटलेले गोळे घालून लालसर होईपर्यंत तळून घ्या. मध्यम आचेवर तळा. अशा प्रकारे तळलेले क्रिस्पी किचन पेपर किंवा चाळणीत काढा म्हणजे जास्तीचं तेल निथळेल. यात पद्धतीनं सर्व क्रिस्पी तळून घ्या. अशा प्रकारे पालक मेथी क्रिस्पी तयार आहेत. ते लगेच सर्व्ह करणार नसाल तर हवा बंद डब्यात ठेवा.

टीप
- फक्त तांदळाचं पीठ वापरल्यास हा पदार्थ जास्त दिवस टिकतो.
- मिरची आणि लाल तिखटाऐवजी काळीमिरी पूड घाला.