सारणाच्या खमंग पुऱ्या

रोहिणी गुरव, वरळी

साहित्य- तीन वाट्या बारीक रवा, अर्धी वाटी मैदा, अर्धी वाटी गूळ, चवीनुसार मीठ, दोन टेस्पू साजूक तूप, दोन टेस्पून गव्हाचं पीठ, तळण्यासाठी तेल.

कृती- प्रथम दोन वाट्या बारीक रवा, अर्धी वाटी मैदा आणि मीठ यात दोन टेस्पून तेलाचं मोहन घालून घट्ट कणीक मळून घ्या आणि अर्धा तास बाजूला ठेवून द्या. नंतर एका कढईत साजूक तुपात एक वाटी बारीक रवा लालसर भाजून घ्या. नंतर साजूक तुपात गव्हाचं पीठही भाजून घ्या. भाजलेला रवा आणि गव्हाचे पीठ गार झाल्यावर अर्धी वाटी चिरलेला गूळ त्यात घालून मिश्रण एकजीव करून घ्या. मग बाजूला ठेवून दिलेल्या कणकेचे पुरीएवढे छोटे गोळे करून त्यात अर्धा चमचा सारण भरून जाडसर पुऱ्या लाटा. मध्यम आचेवर सोनेरी रंग येईपर्यंत दोन्ही बाजूंनी खमंग तळा आणि गरमागरम सर्व्ह करा.

टीप- या पुऱ्या आठ दिवस टिकतात. बाहेरगावी प्रवासाला जाताना या पुऱ्या पोटभरीचा पर्याय ठरतात.