तांबड्या भोपळ्याची पौष्टिक खीर

भोपळ्याची भाजी सगळ्यांनाच आवडते असं नाही, कारण त्याची गोड चव. त्यामुळे बहुतेकांच्या घरी भोपळा ऑप्शनलाच टाकला जातो. मात्र भोपला केवळ भाजीच्या स्वरूपातच खायला पाहिजे असं नाही; उलट तांबडा भोपळा, लाल भोपळा, काशीफळ, गंगाफळ अशा विविध नावाने ओळखल्या जाणाऱ्या भोपळ्यापासून अनेक पदार्थ करता येतात. उदाहरणार्थ घारगे, पुऱ्या दशम्या ते अगदी खीरही करता येते. भोपळ्याची खीर अगदी खासच लागते, म्हणून या खिरीचीच रेसिपी इथे देत आहे-

साहित्य : पाव किलो तांबडा भोपळा किसून घेतलेला, अर्धा लिटर दूध, एक वाटी साखर, वेलची पावडर एक चमचा, साजूक तूप अर्धी वाटी, सुका मेवा भरड अर्धी वाटी, मनुका मूठभर, गुलकंद दोन चमचे, केशर, चिमूटभर मीठ.

कृती : भोपळा वाफवून घ्यावा. नंतर थंड झाल्यावर मिक्सरमध्ये बारीक करून कढईत तूप गरम झाले की तूप सुटेपर्यंत तो परतून घ्या. नंतर साखर घालून शिजू द्या, थोड्या वेळाने दूध घाला. तसंच वेलची पावडर, सुका मेवा भरड घालून आणखी पाच मिनिटं शिजल्यावर त्यात गुलकंद घाला. मनुका व केशर घालून सर्व्ह करा. तांबड्या भोपळ्याची ही पौष्टिक आणि चविष्ट खीर सर्वांनाच आवडेल!

टीप - ही खीर जरा बदल म्हणून सणावाराला करायला देखील काहीच हरकत नाही, मीठ ऐच्छिक आहे.

- लतिका पी. देशमुख, बदलापूर