तांदळाच्या पीठाचे घारगे

डॉ. राजश्री नवलाखे

साहित्य- सारणाकरता- दोन वाटी तांदळाचं पीठ, दीड वाटी साखर, दोन वाटी पाणी

पुरीकरता- दोन वाटी मैदा, दीड वाटी बारीक रवा, मोहनाकरता तेल, १ चमचा साखर, चवीपुरतं मीठ, तळण्याकरता तेल

कृती- सारणाकरता एका ताटात तांदळाचं पीठ आणि बारीक साखर एकत्र करावी. आता एक जाड बुडाच्या भाड्यात पाणी उकळण्यास ठेवावं. त्यामध्ये एक चमचा तूप किंवा लोणी घालावं. पाणी उकळल्यावर त्यामध्ये एकत्र केलेले तांदळाचं पीठ आणि साखर घालून उकड काढावी. मंद आचेवर वाफ आणावी. नंतर ताटात काढावं. गरम असतानाच थोडा तेलाचा हात लावून चांगले मळुन घ्यावं. त्याचे गोल लाडवांसारखे गोळे करून बाजूला ठेवावे. तोपर्यंत पुरीकरता रवा आणि मैदा एकत्र करावा. त्यामध्ये तेल, एक चमचा साखर आणि चवीपुरतं मीठ घालून घट्ट भिजवावं. अर्धा तास मुरल्यावर छोटे-छोटे गोळे करावे. एक गोळा घेऊन थोडासा लाटून पुरणासारखा त्यामध्ये सारणाचा गोळा भरून पुरी लाटावी. कढईत तेल घालून चांगलं गरम झाल्यावर मध्यम आचेवर पुऱ्या तळाव्यात. पुरी नको असल्यास सारण भरून पराठे पण करू शकता. गोड पराठेपण छान चवीष्ट होतात.