शिराळ्याच्या सालांची कुरकुरीत भजी

शिराळींच्या सालांची अनेकजण चटपटीत चटणी बनवतात. पण त्या सालांचीच जेवणाची लज्जत वाढवणारी कुरकुरीत भजी केली तर!

साहित्य : शिराळ्यांची सालं १ वाटी, पाणी १ टेबल स्पून, तिखट १ टी-स्पून, चवीपुरतं मीठ, ओवा, गरम तेल २ टी-स्पून, बेसन १ वाटी (थोडं कमी-जास्त होऊ शकतं)

कृती : शिराळ्यांच्या सालींमध्ये १ टेबल स्पून पाणी घालून ती मिक्सरमध्ये बारीक वाटून घ्या. नंतर त्यात वरील सर्व साहित्य घालून मिश्रण छान एकजीव करा. या मिश्रणाचे छोटे छोटे गोळे करून ते तेलात सोनेरी रंगावर तळून घ्या. तेला खाण्याविषयी जागरूक असाल, तर फ्राय पॅनमध्ये थोडं तेल घालून त्यावर गोळे चपटे थापून शॅलो फ्राय करा. ही भजी एकदम खमंग आणि कुरकरीत लागतात.

टीप : शिराळ्याच्या सालींमध्ये फायबर आणि जीवनसत्त्वं असतात. ह्यात बेसना ऐवजी आपण सालीची मूग डाळ भिजत घालून ती ही वाटून घालू शकता. तसंच शिराळ्यांच्या सालांप्रमाणेच दुधीची सालं, पालकच्या देठांचीही भजी करू शकता.

कांचन रानडे , डोंबिवली