टिंडोरा बिर्याणी

प्रियांका शिंदे-जगताप, पलावा

तोंडली म्हणजेच टिंडोरा ही वेल वर्गीय भाज्यांमध्ये गणली जाणारी भाजी आहे. गुणकारी, पोषणमूल्यांनी युक्त व रक्तदाबाला नियंत्रित ठेवून हृदयरोगापासून कवचकुंडलासारखे कार्य करणारी ही तोंडली भाजी असते. भरली तोंडली वा तोंडलीच्या कापांची तेलात परतून केलेली भाजी तर छानच लागते. पण याच तोंडलीची जर आपण खमंग अशी बिर्याणी बनवली तर एक आगळीवेगळा पदार्थ तयार होईल व एकदम झक्कास असा शाही बेतही होऊ शकेल. त्यासाठी आपण आदल्या दिवशी शिल्लक राहिलेल्या भाताचाही सदुयपोग करून घेणार आहोत. आधी शिजवून घेतलेला भात असेल तर रेसिपी चटकन होते. चला तर मग सर्वप्रथम साहित्य पाहू व मग कृती.

साहित्य- तोंडली, कांदा, जिरे, हळद, मीठ, तिखट, गरम मसाला, तयार बिर्याणी मसाला, कढीपत्ता, लसूण, शिजलेला भात (गरजेनुसार), सजावटीसाठी आवडीप्रमाणे काहीही.

कृती- टिंडोरा बिर्याणीचा श्रीगणेशा करताना सर्वप्रथम एका भांड्यामध्ये उभ्या आकारात बारीक चिरलेली तोंडली मीठ-हळद-तिखत घालून तेलात व्यवस्थित खुसखुशीत परतून घ्यावी. नंतर ती एका ताटात काढून घ्यावी. त्याच भांड्यामध्ये चिरलेला कांदा, लसूण व कढीपत्त्याची फोडणी देऊन त्यात हळद, गरम मसाला व तयार शाही बिर्याणी मसाला घालून मस्त खमंग तडका द्यावा. सर्व घटक व्यवस्थित एकजीव करावेत. नंतर परतलेल्या तोंडलीचे काप त्यात घालून, आदल्या दिवशीचा उरलेला भात/आधी शिजवून घेतलेला भात त्यात घालावा. प्रमाणानुसार मीठ व तिखट घालावं. थोडंसं तेलही मधूनच सोडावं. जेणेकरून तो भात पातेल्याला चिकटणार नाही. त्या भांड्यावर झाकण ठेवून थोडा वेळ शिजू द्यावं. दहा मिनिटातच आपली ही झटपट अशी 'टिंडोरा बिर्याणी' तयार.

सजावटीसाठी- त्यावर बारीक चिरलेली कोथिंबीर, काकडीच्या-गाजराच्या काप अथवा काजू-बदाम असं काहीही कलात्मकरित्या तुम्ही वापरू शकता.

टिंडोरा बिर्याणीबरोबर जर रायतं तोंडी लावायला असेल तर खवय्येगिरीचा आनंद हा नक्कीच शिगेला पोहोचेल.