शरद निकाळे नायगाव म्युनिसिपल सेकंडरी हायस्कूलच्या पाच वर्गमित्रांनी दहावीनंतर एकत्र येऊन सन १९७२मध्ये ‘शिवशक्ती कला पथका’ची स्थापना केली. सुरुवातीला घरगुती बैठक, भावगीतं, लोकगीतांचे कार्यक्रम सादर करता-करता लोकनृत्यांचा चांगलाच फड जमला. हौशी कलावंत म्हणून या नृत्यप्रवाहात नायगाव-दादर ते माझगाव, कुर्ला-कमानी ते विक्रोळीपर्यंतचे कलाकार जोडले जाऊ लागले. मुंबईतील त्यावेळच्या नामांकित गणेशोत्सव, नवरात्रोत्सवांमध्ये आम्हाला कला सादर करण्याची संधी मिळाली. पथकातले काही कलावंत व्यावसायिक वाद्यवृंदात जाऊ लागल्याने तिथले व्यवसायिक कलाकारही अल्प मोबदल्यात आमच्या पथकात सहभागी झाले. महाराष्ट्र राज्य निर्मितीला सन १९८५मध्ये २५ वर्षं पूर्ण झाली. या पार्श्वभूमीवर संस्थेने राज्यातील प्रसिद्ध शाहिरी पोवाडे, पारंपरिक लोकगीतं, वासुदेव, भारुड, गोंधळ, शेतकरी नृत्य, कोकणातील जाकडी नृत्य, आदिवासी नृत्य धनगर गज नृत्य, करपल्लवी आणि कोळी लोकांचे पारंपरिक कोळीनृत्य सादर केले. ‘मराठमोळा गजरा आगळा’ या नावाने १९८५साली महाराष्ट्र राज्याच्या रौप्यमहोत्सवावेळी शिवशक्ती पथकाने मानवंदना देऊन उत्सवकाळात त्यांचे मोठ्या संख्येने सादरीकरण केले. या कार्यक्रमांना मिळालेल्या उदंड प्रतिसादामुळे मुंबईतील नामांकित थिएटरमध्ये कार्यक्रम सादर करण्याची संधी मिळाली. या पथकात तोपर्यंत १४३ कलाकार सहभागी झाले. आजही शिवशक्ती कलापथक ही संस्था नसून ते आम्हा कलावंतांचे कुटुंब बनले आहे. या कुटुंबांचे नुकतंच स्नेहसंमेलन आयोजित करण्यात आलं होतं. यावेळी त्या पाच संस्थापक मित्रांच्या अभंग मैत्रीची पन्नाशी साजरी करण्यात आली. या स्नेहसंमेलनाने आम्हा साऱ्या कलावंतांना पुन्हा एकदा नवनिर्मितीची उभारी दिली. २० वर्षं हौशी रंगभूमीची सेवा केली तशीच पुन्हा घडावी याचा संकल्प करत संमेलनाची सांगता झाली.
मैत्रीची पन्नाशी
महाराष्ट्र राज्य निर्मितीला सन १९८५मध्ये २५ वर्षं पूर्ण झाली. या पार्श्वभूमीवर संस्थेने राज्यातील प्रसिद्ध शाहिरी पोवाडे, पारंपरिक लोकगीतं, वासुदेव, भारुड, गोंधळ, शेतकरी नृत्य, कोकणातील जाकडी नृत्य, आदिवासी नृत्य धनगर गज नृत्य, करपल्लवी आणि कोळी लोकांचे पारंपरिक कोळीनृत्य सादर केले. ‘मराठमोळा गजरा आगळा’ या नावाने १९८५साली महाराष्ट्र राज्याच्या रौप्यमहोत्सवावेळी शिवशक्ती पथकाने मानवंदना देऊन उत्सवकाळात त्यांचे मोठ्या संख्येने सादरीकरण केले.
Maharashtra Times 24 May 2016, 12:12 am