मोहिनी क्षीरसागर आयुष्यात पहिल्यांदाच असं प्रिय म्हणून पत्र लिहिते आहे. पाच वर्षं आणि दोन महिन्यांची आपली ओळख. पाच वर्षं होताहेत आपल्या लग्नाला. जाणत्या वयात सुजाण पालकांसमवेत ठरलेलं आपलं लग्न. जेव्हा लग्नाला उभी राहिले, तेव्हा एकच अपेक्षा होती, तो जबाबदारी घेणारा पाहिजे. घरी लहानपणापासून जबाबदारी घेतल्यामुळे आता ती नको होती मला. तू ती समर्थपणे पार पाडतोस. या पाच वर्षांत आपण भांडलोच नाही अस अजिबात नाही. भांडणानंतर तासाभरापेक्षा जास्त वेळ बोललोच नाही, असंही नाही. कधी मी मिटवलं, कधी तू. स्वभाव खूप वेगवेगळे आहेत आपले. कित्येक गोष्टीत अजिबात पटत नाहीत; पण सगळंच गोड कशाला पाहिजे असं तूच म्हणतोस ना. कित्येकदा मी चिडते, बोलते. तू ही बोलतोस; पण नंतर आपण विसरतो आणि पुन्हा नव्यानं भांडतो. गोड आहे हे सगळंच. एकाच युनिटमध्ये काम करतो, त्यामुळे जाणं-येणं सोबत. याचमुळे एकमेकांची अखंड सोबत लाभते आपल्याला. दोघांचेही मित्र मैत्रिणी आहेत. एकमेकांच्या समोरच आहेत. नवरा-बायको असलो, तरी वेगवेगळं आयुष्य आहे, हे समजून, उमजून एकमेकांना विश्वासानं हवी ती स्पेस देतो. तुला कायम अहो म्हणणारी मी, आज पत्र मात्र एकारार्थी अरेनं लिहिते आहे. असंच लिहावंसं वाटलं म्हणून. या आपल्या संसारातील वेलीवर उमलेलं हसरं फुल आरोही. तिचा गोड सहवास आणि आपले पप्पा वय वर्षं सदुसष्ट असतानाही दोन वर्षांच्या आरोहीला जिव्हाळ्यानं सांभाळणारे. खरंच नशिबवान आहे मी. अखंड बडबड करणारा तुझा लाघवी स्वभाव माझं घर भरून टाकतो आणि माझ्यासारख्या शांत मुलीलादाखील बोलायला लावतो. या सगळ्यांबद्दल मनापासून थँक यू. लग्नाला पाच वर्ष झाल्यानंतर लिहिलेल्या पत्रातील माझं तुझ्याबद्दलचं मत वर्षानुवर्षं असंच राहील. आजकाल तडकाफडकी घटस्फोटांकडे जाणाऱ्या आपल्याच पिढीतील सगळ्यांना पाहून वाटतं, किती सुंदर असतं हे लग्नाचं नातं. थोडी तडजोड करा आणि त्याचा गोडवा चाखा. आपल्या सर्वांच्या साथीनं आयुष्यातील संध्याकाळही अशीच रम्य अन् सुंदर होईल, याची खात्री आहे.
यू, मी और हम...
पण नंतर आपण विसरतो आणि पुन्हा नव्यानं भांडतो. गोड आहे हे सगळंच. एकाच युनिटमध्ये काम करतो, त्यामुळे जाणं-येणं सोबत. याचमुळे एकमेकांची अखंड सोबत लाभते आपल्याला. दोघांचेही मित्र मैत्रिणी आहेत. एकमेकांच्या समोरच आहेत. नवरा-बायको असलो, तरी वेगवेगळं आयुष्य आहे, हे समजून, उमजून एकमेकांना विश्वासानं हवी ती स्पेस देतो.
Maharashtra Times 31 May 2016, 12:12 am