एक सुंदर कविता!

उमेश पटवर्धन, नाशिक
तू माझ्या आयुष्यात येण्याआधी माझ्या बायकोबद्दलच्या खूप साऱ्या अपेक्षा होत्या. ती कलाकार असावी, गायिका, कवियित्री वा लेखिका असावी वगैरे वगैरे. पण तू आयुष्यात आलीस आणि माझे आयुष्यच एक सुरेल गाणे बनून गेले अन् आपले सहजीवन एक सुंदर कविता!
तुझ्या येण्याने माझ्या अपेक्षांच्या पलीकडे असणाऱ्या गोष्टी मला हळूहळू जाणवू लागल्या. मग ते तुझं सौंदर्य असो वा ‘मृग’ नक्षत्राला सार्थ ठरवणारी तुझी चपळता! या चपळतेमुळेच दररोज सकाळी सर्वांचा स्वयंपाक करून डबे भरून सातच्या आत नोकरीसाठी घराबाहेर पडणे तुला जमते आणि हे तू गेली ८ वर्षे अथकपणे करत आहेस. प्रेम काय फक्त शब्दांनीच व्यक्त करता येतं का बरे?
शाळेतल्या मुलांची तू लाडकी टीचर आहेस आणि माझ्या मुलाची लाडकी आई! तू माझी आर्थिक सल्लागार तर आहेसच पण मोठ मोठे आर्थिक व्यवहार तू सहजपणे पार पाडतेस. तुझ्या हातच्या पदार्थांनी तर मन तृप्त होऊन गेले आहे. किती किती लिहू? स्वप्न आणि वास्तव यात नेहमीच अंतर असतं. पण स्वप्नापेक्षा वास्तव सुंदर असू शकतं हे तुझ्या सहवासात राहून मला सतत जाणवत आहे.