सारे कसे सुनेसुने

>> वसंत सावंत, पनवेल

लग्नाचा वाढदिवस ही खरंतर आनंदाची गोष्ट पण २०१६सालचा वाढदिवस मात्र माझ्यासाठी फार वाईट होता. कारण माझी पत्नी मला कायमची सोडून गेली होती. १८मे १९६९ला आमचं लग्न झालं तेव्हा लीला विठ्ठल जाधवची ती मंदाकिनी वसंत सावंत झाली. डिलाइल रोडच्या दहा बाय दहाच्या रुममध्ये तिने अत्यंत सुखाने, हसतमुखाने संसार केला. प्रत्येक अडीअडचणीत ती माझ्यासोबत होती. बेताच्या परिस्थितीतही तिने आमच्या मुलांना चांगलं शिक्षण देऊन त्यांना आपल्या पायावर उभं केलं. इतक्या वर्षांत ती कधीच मला एकट्याला सोडून कुठेच गेली नव्हती. आमचा संसार, मुलं, नातवंडं, सुना हेच तिचं जग होतं. सध्या आम्ही पनवेलला मोठ्या घरात सुखाने राहत होतो. एकाएकी १४ मार्चला ती हृदयविकाराच्या झटक्याने अचानक हे जग सोडून गेली. आता ती नसल्यामुळे आयुष्य भकास वाटत आहे. प्रत्येक क्षणी मला तिची आठवण येते. तिच्याशिवाय आयुष्य फारच कठीण झालंय. खरोखर ती नसल्याने मन सैरभैर झालं आहे.