आनंदी ठेवा

शिवाजी फणसेकर, वडाळा

जीवनामध्ये प्रत्येकाला आवडता छंद असतो. कुणी आवडत्या वस्तूचा संग्रह करतो तर कुणी गायन, वादन, कला यांचा छंद जोपासतो. तसाच माझा आवडता छंद एखाद्याला शुभेच्छा पत्र देणं हा आहे. एखाद्याला प्रोत्साहन देण्यासाठी, शुभेच्छा देण्यासाठी विविध शुभेच्छा पत्रांची दुकानं पालथी घालतो. १०० शुभेच्छा पत्रांतून एकाची निवड करतो, जेणेकरून त्याच्या जीवनाशी, वयाशी संबंधीत शुभेच्छा पत्र असल्यामुळे त्या व्यक्तीला तसं शुभेच्छा पत्र मिळाल्यावर फार मोठा हर्ष होत असतो. आपण एखाद्याला पैसा, वस्तू देऊ शकत नसतो परिस्थितीवश आपल्याला एखाद्याला त्याच्या आनंदात भरभरून द्यावंसं वाटतं. पण खिशाची पदरमोड करून त्याला स्वहस्ते काढलेली पेंटिंग, शुभेच्छा पत्र, कविता याद्वारे त्यांचा एखाद्याला प्रोत्साहन द्यायला मला आवडतं. त्या व्यक्तीचा चेहरा द्विगणित होताना, आपलं दुःख विसरून त्यांच्या आनंदात सहभागी होण्याचं भाग्य फार वेगळं असतं. अशी आजपर्यंत हजारो शुभेच्छा पत्र, पेंटिंग ही शालेय मुलं, शिक्षक, डॉक्टर, पत्रकार, वृत्तपत्र लेखक, लोकप्रतिनिधी, ज्येष्ठ नागरिक, गुणी खेळाडू, कलावंत, सामाजिक कार्यकर्ते यांना दिलेली आहे. हा माझा आयुष्यातील दुःख विसरून आनंदाचा ओलावा देण्याचा छंद आहे.