​ मनातील शब्दफुलं

शीतल मुळीक, मुलुंड

निवडुंगातून फुल फुलावे तशी शुष्क दिनक्रमात मनात शब्दांची फुलं फुलतात आणि मग ती कुठेतरी टिपून ठेवावी असा हव्यास होतो. प्रगत तंत्रज्ञानाने शब्द ऑनलाइन टिपून ठेवून ते इतरांशी वाटण्याची सोय करून ठेवलीय. त्यामुळे माझा छंद जोपासायला एकप्रकारे चालना मिळाली आहे. मी माझ्या मनातील शब्द फुलं माझ्या ब्लॉगवर लिहिते. हा लिहिण्याचा खटाटोप मी ८ वर्षांची असल्यापासून सुरु झाला. मला हे माहीत होतं की, आपण काही खास लिहीत नाही. पण २००३मध्ये साहित्य आणि संस्कृती मंडळाने माझ्या पहिल्या कवितासंग्रहाला अनुदान देऊन मी लिहीत राहावं यावर शिक्कामोर्तब केलं.
साधारण २०१३ मध्ये मला कॅन्सरने ग्रासलं. कंपनीने वर्क फ्रॉम होमचा पर्याय उपलब्ध करुन दिला आणि कामाचा व्यापही बराच कमी केला. या मोकळ्या वेळेत मनाला उभारी यावी म्हणून काहीतरी करायची इच्छा निर्माण झाली आणि मी माझं लिखाण लाइव्ह करायला सुरुवात केली. दोस्त मंडळींच्या व्यक्तिमत्वावर कविता करणं हा माझा प्रसिद्ध छंद आहे. 'पोएम ऑन पर्सनॅलिटी' या लेबलखाली मी कुणाल, शिल्पा, अंजू, शक्ती या दोस्तांवर कविता लिहिल्या. माझा समुद्र कविता संग्रहही लाइव्ह करून टाकला आणि मित्र मंडळींना वाचायला दिला. सुंदर छायाचित्रांवर कविता लिहिणं आणि मित्र मंडळींना खुश करणं यात माझा हातखंडा आहे. अभिव्यक्ती या लेबलखाली मी अशी अनेक छायाचित्र कविता करून लाइव्ह केलीत. माझी उरलेली दोन सदरं म्हणजे 'मस्करीची कुस्करी' आणि 'मनापासून' ही आहेत. मस्करीच्या कुस्करीतील, मस्करी अनेकांना खुश करून गेली आणि मनापासूनमधला हळवेपणा अनेकांना भावला.