सकारात्मक विचारांची शिदोरी

उचिता जुवाटकर, डोंबिवली

मी एक वही केली आहे, ज्यामध्ये मी नेहमी सकारात्मक विचारांचा संग्रह करते. सकारात्मक विचार म्हणजे सुविचारच नव्हे, तर त्यात प्रोत्साहनपर छोट्या लेखांचा, कलामांच्या सुंदर विचारांचा, आत्मविश्वास वाढीस लावणारी सुंदर वाक्ये, व्यवस्थापनाची कौशल्ये अशा आणि इतर लेखनाचा समावेश असतो. वृत्तपत्रे, पुस्तकं वाचताना आवडलेला लेख, गोष्ट यातून मला जे काही बुद्धीस सकस वाटते, ते मी या वहीत सार स्वरूपात लिहून ठेवते. हे लिहीत असताना ते दिसायला सुंदर असेल याची काळजी घेते. वेगवेगळ्या रंगांच्या शाईच्या पेनांनी छोटी नक्षीकाम करून, मुख्य विचार अधोरेखित करून मी वही सजवते. अशाने परत वही वाचताना प्रसन्न आणि उत्साही वाटतं.
मुळात मला हा असा छंद जडण्यामागचं मुख्य कारण म्हणजे नेहमीच्या धकाधकीच्या जीवनात आपली शारीरिकच नव्हे तर मानसिक आणि वैचारिक दमछाकही होत असते. त्यात जर तुम्ही प्रगतीपथावर असाल तर मानसिक खच्चीकरण करणारे अनेक लोक तुमच्या आजुबाजूला फिरत असतात. अशावेळी गढूळ वातावरणातून स्वत:ला बाहेर काढण्यासाठी मला ही वही पर्यायाने माझा छंद उपयोगी पडतो. माझी ही वही माझी इच्छाशक्ती बळकट करण्यासाठी मला कायम प्रेरणा देत असते. मी माझ्या वहीला 'Everyday Reading Book' असं नाव दिलं आहे. कारण जशी आपल्याला नियमीत शारीरिक खाद्याची आवश्यकता असते तशीच नियमीत वैचारिक खाद्याचीही आवश्यकता असते. ही वही दिवसेंदिवस अनेकविविध सकारात्मक विचारांनी वृद्धींगत होत आहे, तरीही त्यातील जुने विचार प्रत्येक वेळच्या वाचनात मला नव्याने भेटतात. नव्या-वेगळ्या नजरेने परिस्थितीकडे पहायला भाग पाडतात आणि मला नव्याने समृद्ध करून जातात. असा हा माझा छंद माझ्या विचारांना सक्षम करणारा आहे.