प्रिय सखीच!

वैशाली जोशी, खारघर
दोन बेडरूम हॉल किचन असा आमचा सुटसुटीत फ्लॅट आहे. त्यातील माझी आवडती जागा म्हणजे पश्चिम दिशेला असलेल्या बेडरूम मधील खिडकी. या खिडकीत माझा दिवसाचा बराच वेळ जातो. त्याला कारणही तसंच आहे. मी शाळेत शिक्षिका होते. आता निवृत्त होऊन दहा वर्षं झाली पण मी ते शालेय जीवन, माझे विद्यार्थी सर्वांची खूप आठवण येते. माझ्या या खिडकीतून बाहेर पाहिलं की, एक छानशी शाळेची इमारत दिसते. मग ती मुलांची लगबग तो चिवचिवाट तो पी. टीचा तास हे सर्व मला अनुभवायला मिळतं.
विविध मूड्सचे मी फोटोज पण काढते. शाळा सुटली की थोडी शांतता होते. मग संध्याकाळी याच खिडकीत बसून मी वाचन आणि लिखाण करते. याच खिडकीत दिवाळीसाठी सुंदर आकाशकंदील लावला जातो. समोरच्या इमारतींमधील दिव्याची रोषणाई, फटाक्यांची आतशबाजी या सर्व गोष्टींचा आनंद मी याच खिडकीतून घेते. विशेष म्हणजे पहाटे या खिडकीतून चंद्र डोकावतो आणि त्याची सुंदर आभा बेडरूममधे पसरते. कधी-कधी शुक्रताऱ्याचे शुभ्रधवल सौंदर्यही मी याच खिडकीतून न्याहाळते. पावसाळ्यातही ही खिडकी आणि त्याबाहेरचे सुंदर वातावरण माझं भान हरपून टाकते. कितीतरी कविता मी याच खिडकीत बसून केल्या आहेत. अशी ही जीवलग मैत्रिणीसारखी खिडकी जणू माझी प्रिय सखीच!