फिटे अंधाराचे जाळे

मनामध्ये निराशेचं धुकं साचलं, की आठवून ताजंतवानं व्हावं आणि सारं वातावरण स्वच्छ, सुंदर भासू लागावं असं चिरतरूण गाणं म्हणजे ‘फिटे अंधाराचे जाळे झाले मोकळे आकाश.’
बाबूजी अर्थात सुधीर फडके आणि आशाताईंच्या युगुलस्वरातलं हे गाणं श्रीधर फडके यांनी संगीतबद्ध केलं आहे. श्रीधर फडके यांनी संगीत दिलेला हा पहिला सिनेमा. त्याचं नाव ‘लक्ष्मीची पाऊले.’ बाबूजींनी श्रीधरजींच्या संगीत दिग्दर्शनाखाली गायलेलं हे पहिलं गाणं. संगीतकार ‌वडिलांनी आपल्या संगीतकार मुलाकडून हे गाणं शिकून घेतलं आणि आशाताईंसोबत उत्कटपणे भावपूर्ण गाऊन अजरामर केलं.
रान जागे झाले सारे,
पायवाटा जाग्या झाल्या
सूर्य जन्मता डोंगरी,
संगे जागल्या सावल्या
एक अनोखे लावण्य,
आले भरास भरास...
पडद्यावर रंजना आणि रवींद्र महाजनी या जोडीनं हे गाणं जिवंत केलं आहे. पडद्यावर ते आपल्याला कृष्णधवल रूपात दिसत असलं, तरी ते निसर्ग सौंदर्य मनाला भुरळ घालतं.
क्षणापूर्वीचे पालटे जग उदास उदास,
असं म्हणत आपल्याही मनातली उदासीनता दूर करतं. म्हणूनच माझ्या आवडत्या गाण्यांपैकी हे एक गाणं आहे.