एका ट्रिपची गोष्ट- लहान पऱ्यांसोबतची धमाल
सोनाली जोशी, माजगाव
दादर येथील आमच्या श्रीमती कमला मेहता अंधशाळेची वार्षिक सहल ठाणे येथील टीकूजीनी वाडी येथे आयोजित केली होती. ठरल्याप्रमाणे सकाळी सात वाजता सर्वजण शाळेमध्ये जमलो. एकूण १२७ विद्यार्थिनी आणि ५२ शिक्षिका, कार्यालयीन कर्मचारी आणि वसतिगृह कर्मचारी असे एकूण १७९ जण होतो. सकाळी आठ वाजता चार बसमधून आमच्या प्रवासाला सुरुवात झाली. बसमध्ये अंताक्षरीचा खेळ खेळत दीड तासांनी आम्ही 'टीकूजीनी वाडी' येथे पोहोचलो. तिथं पोहोचल्यावर आम्ही सर्वांनी नाश्ता केला. त्या दिवशी खूप शाळांचे विद्यार्थी पिकनिकसाठी आले होते, त्यामुळे तिथं खूपच गर्दी होती.
प्रत्येक बसच्या शिक्षिका आणि कर्मचाऱ्यांबरोबर विद्यार्थिनींची विभागणी केली. त्यानुसार प्रत्येक शिक्षिका व कर्मचाऱ्यांकडे चार ते पाच विद्यार्थिनींची जबाबदारी होती. अम्युझमेंट पार्कमध्ये 'स्विंग चेअर', 'आकाश पाळणा', 'बाऊंसिन्ग कार', 'स्पिन कोस्टर', 'टॉय ट्रेन', 'कॅस्टल राइड', 'हेलिकॉप्टर राइड' इ. राइड्स आहेत. तसंच डायनासोर वर्ल्ड आणि मत्स्यालय आहे. आमच्या बसमधील मुलींना सर्वात आधी 'स्विंग चेअर'मध्ये बसवलं. त्यानंतर आकाश पाळणा, बाऊन्सिंग कार, ड्रॅगन बोट, कॅस्टल राइड इ. राइड्समध्ये बसवलं. त्यानंतर आम्ही आमचा मोर्चा डायनासोर पार्ककडे वळवला. तिथं मुलींना डायनासोरची माहिती सांगितली. जेवणानंतर आम्ही मुलींना टॉय ट्रेन, अॅनिमल किंग्डम, टोरा-टोरा, ड्रॅगन ट्रेन, वॉर्म कोस्टरमध्ये इ. राइड्समध्ये बसवलं. मुलींनीसुद्धा न घाबरता प्रत्येक राइडचा मनमुराद आनंद लुटला. माझ्या या लहान पऱ्यांनी खूप धमाल केली आणि त्यांच्यासोबत घालवलेले हे मौल्यवान क्षण मीही मनात साठवून ठेवले. संध्याकाळी सर्व मुलींची हजेरी घेतली. सहलीच्या शेवटी सर्वांना आईस्क्रीम दिलं आणि गोड आठवणी घेऊन आम्ही शाळेच्या दिशेनं परतीचा प्रवास सुरु केला.