नभ उतरु आलं

मानसी कुलकर्णी
मी अलीकडेच खारघरला शिफ्ट झाले आणि माझी ओळख येथील भजनीमंडळातील भगिनींशी झाली. मला खूप छान मैत्रीणी मिळाल्या. असंच आम्ही सगळ्याजणी मिळून सोलनपाडा धबधब्याला ट्रिप काढायचं ठरवलं. सगळ्या ५० ते ७० वयाच्या तरुणी पंजाबी सूट, जीन्स-टीशर्ट, साडी वगैरे घालून ठरल्या जागी रविवारी भेटलो आणि तिथून बसने प्रवासाला सुरुवात केली. सगळ्यांच्या उत्साहाला उधाण आलं होतं. गाणी भेंडया, उखाणे, नाच अशी धमाल करत चाललो होतो. आजूबाजूला हिरवागार निसर्ग पाहून मन आणि डोळे अगदी तृप्त झाले. काळे ढग खाली उतरुन आले होते. डोंगरावरून वाहणारे असंख्य झरे, लहान-मोठे धबधबे पाहून मन ऊंचबळून आलं. भराभर सर्वांनी फोटो काढले.
पावसाच्या धारा बरसत होत्या आणि खाली मस्त चिखल. अजून भरपूर पाऊस न झाल्यामुळे धरणात पाणी कमी होतं. ते पाहून प्रथम आम्ही हिरमुसलो पण जे आहे त्यात आनंद मानून आम्ही खूप धमाल केली. कोणी पाण्यात डूंबत होतं तर कोणी चेंडू खेळत होतं. वरुन पावसाची संततधार सुरुच होती. आम्ही खडकांवर चक्क उताणे झोपलो. खाली झुळझुळ वाहणाऱ्या पाण्याचा स्पर्श सुखद वाटत होता तर वरुन पडणारं पावसाचं पाणी चातकाप्रमाणे पित होतो. हा अनुभव खूपच रोमांचकारी होता. वाटेत गरमागरम पिठ्ठलं-तांदळाची भाकरी, खर्डा असं मस्त जेवण केलं. आनंद उरात भरुन परतीच्या प्रवासाला लागलो.